19 June 2019 In Nûçeyên Hevbendiyê

Serokê desteya danûstandinên Sûrî Nesir Elherîrî got ku Rûsya hêj piştgiriya rêjêma Esed ya leşkerî dike, û çûna pirosesa siyasî ne di bala wan de ye, û destnîşan kir ko di heman çaxî de Îran têwerdana xwe berdewam dike, û dixwaze cihê xwe bêtir çêbike.

Elherîrî di kongirekî rojnamevanî de li Riyadê got ku pirosesa siyasî rawestiyaye, û rêjîm destpêşxeriyên siyasî red dike, û tekez kir ko Rûsya di heman çaxê ko li pêşberî civaka navdewletî li ser pirosesa siyasî dipeyive, lê ew hemû cûreyên çekan li dijî milet li Idlibê bikar tîne, û diyar kir ko wan hevdîtina bi Rûsya re red kiriye heta ko operasiyonên bombebaranê rawestin.

Elherîrî diyar kir ko hêzên rêjîmê û Rûsya sivîlan li Idlib û gundewarê Hemayê amanc dikin, û zarok û jin û pîr amancên bombeyên Rûsyê ne, û salixa operasiyonên leşkerî yên rêjîmê û Rûsya da û got ko ew bobelateke mirovînî ye.

Elherîrî anî ziman ko operasiyonên leşkerî 900 Sûrî ji nav wan 210 zarok têk birin, û bêtir got ko operasiyona leşkerî bêtir ji nîv milyon Sûrî ji malên wan koçber kirine û jêrxan heta bi nexweşxane û mal û firneyan wêran kirine.

Derbarê têwerdana Îran ya nerewa di Sûriyê de, Elherîrî bal kêşand ser ko planên têwerdana Tehran di dezgehên dewletê û yên ewlehî û artêşê pirtir dibe, her weha milîtanên xwe tevlî artêşa rêjîmê kirine.

Elherîrî got ku Îran berê milet dide mezheba şî’hî , û di pirojeyê xwe yê mezhebperestî de berdewam e, û got ku çi çareseriya siyasî li Sûriyê pêk nayê eger Îran venekişe, û got: ‘’ em çi çareseriyê napejirînin eger hebûna Îran ya leşkerî li Sûriyê hebe, û emê tevaya xerabiyên îranê yên di civaka sûrî de kirine paqij bikin.‘’

Elherîrî dibîne ko êdî metirsiya Îranê gef e li ser aştî û ewlehiya navdewletî û herêmî, piştî ko barguhêzên petrolê yên kendavê amanc kirine, û daxwaz ji hêzin Libnanî kir ko dûrî hizbullaha tirorist û Îran û rêjîma Esed bikevin, û miletê Sûrî hilbijêrin, ne rêjîma ko rojekê ji rojan Libnanî li kolanan dikuştin.  

Jêder: Ofêsa Ragehandinê ya Hevbendiya Niştimanî

18 June 2019 In Nûçeyên Hevbendiyê

Seroka Birêveberiya Karûbarên penaberan ya Hevbendiya Niştimanî ya Hêzên Şoreşê û Rikberiya Sûriyê, Emel Şêxo, tekez kir ko daxuyaniyên wezîrê derve yê Libnanê Cibran Basîl rêjeya kînê li dijî penaberên Sûrî bêtir kir, û destnîşan kir ko ew daxuyanî pirsgirêkên Libanê yên abûrî û civakî çareser nakin.

Şêxo hişyarî da ko ev daxuyaniyên gurkirinê nijadperestiyê li Libnan û herêmê bêtir dikin, û got: ‘’Ew dê tenê nearamî û arîşeyan di civaka Libnanî de bêtir bike, û dê bihelê bibe mîna bombeyeke li ber teqînê. ‘’

Û nîgeraniya xwe anî ziman li ser çarenivîsa bi hezaran xelkên Sûrî, ji ber daxuyaniyên nijadperestî riya çareserkirina dosya penaberan diguhêrin.

Şêxo bang li hêzên Libnanî yên xwedan wijdan kir ko piştgiriya penaberên Sûrî bikin, û li himber wan kampaniyên ko Sûrî amanc kirine rawestin, ew Sûriyên milîtanên hizbullah ew ji xaka wan koçber kirine.

Di dema dawî de berpirsiyarine Libnanî kampaniyeke ragehandinî li dijî penaberên Sûrî pêk anîne, digel zêdegavî û tawanên derheqê wan li Libnanê çêdibin, her weha kuştina hin kesan bi tawanên cinayî.

Hevbendiya Niştimanî dibîne ko hemû bûyerên çêbûne, hewildanên neçarkirina Sûriyan ne, bo vegera kotekî , ya metirsî ye li ser jiyana wan, û li dijî biryarên navdewletî ye.

Jêder: Ofisa Ragihandinê ya Hevbendiya Niştimanî ya Sûrî

18 June 2019 In Nûçeyên Hevbendiyê

Hevbendiya Niştimanî ya Hêzên şoreş û rikberiya Sûriyê behîdariya Dr. Mihemed Morsî, serokê berê yê Komara Erebî ya Misrê kir, û pirse û sersaxî da malbata wî û tevaya gelê Misrê yê bira.

Û Hevbendiya Niştimanî di daxwiyaniya xwe de got ku serokê berê ma dilsoz û piştevan ji bo daxwazên gelê Sûriyê û şoreşa azadî, rûmet û demokrasiyê, û herwiha “ma pabend bi pirsgirêkên neteweya erebî bi awayekî zelal, bê xwe vekişîne yan jî bazaran bike li ser pabendbûn û piştgiriya xwe bi her awayekî heyî”.

Û Hevbendiya Niştimanî diyar kir ku ew hêvîdar e ku Misir her dem bimîne wek berê, dîwarekî asê li hember hemû hewldanên li dijî herêmê yên bi armanca pêkanîna gefan li ser ewlekariya herêmê û belavkirina ajawegeriyê, û her weha got: “Em bawer in ku dê Misir berdewam be li ser helwest û pabendbûna xwe li gel miletên mafperwer û rûmetxwaz”.

Û xemgînî û hêrsek mezn li ser malperên têkiliyên civakî peyda bû, û helmetên ragihandinê yên piştgir ji serokê koçadawîkirî re çêbûn, û haştagek bi navê Muhemed Mursî li ser malpera Tiweeter bi zimanê erebî û ingilîzî piştî demjimêrekê ji nûçeye mirina wî belav bû.

Her weha beşek mezin ji çalakvanên sûrî behîdariya wî kirin, û helwestên wî yên li kêleka gelê Sûriyê, û hewildanên wî yên pêşkêşkirina alîkariya rastyeqîn ji bo rizgarkirina Sûriyê ji desthilata stemkar û birina wê ber bi demoqrasiyê de bi bîr anîn.

Jêder: Ofîsa Ragihandinê ya Hevbendiya Niştimanî

17 June 2019 In Nûçeyên Hevbendiyê

Serokê Hevebnediya Niştimanî ya Hêzên Şoreşê û Rikberiya Sûriyê, Ebdilrehman Mistefa, berpirsiyariya bobelatên ko têne serê sivîlan li bakurê Sûriyê da ser milê hêzên Rûsî, û tekez kir ko tu kes ji Mosko pêve nikare operasiyonên bombebarankirina berdewam li ser xalên çavdêriya Tirkiyê pêk bîne.

Mistefa di daxuyaniyên taybet de, îro duşembê, bal kêşand ser ko rola rêjîma Esed di operasiyonên vê dawiyê de tenê cîbicîkirin e, û ev operasiyon ewlehî û aramiya çar milyon sivîl li herêma dorpêçkirî digel sînorê Tirkiyê amanc dike.

Mistefa got ku amancên operasiyona dawî ‘’aşkere bûne, û rola Rûsya bêtir xuya bûye, piştî ko xalên çavdêriya Tirkiyê hatin amanckirin, ‘’ û destnîşan kir ko bombebarankirina wan xalan tekez dike ko ew hewildanê dikin ji bo fişarê bidin ser Enqerê û peymana Idlibê têk bidin, peymana ko rê li ber agirbesteke tekûz li Sûriyê vedikir, da pirosesa siyasî bi çavdêriya Netewên Yekgirtî pêk bê.

Mistefa diyar kir ko operasiyonên leşkerî bûn sedema kuştina bi sedan ji sivîlan û bi hezaran birîndar bûne, hem bi sedhezaran ber bi herêmine bêtir ewle li ser sînorê Tirkiyê derbider bûne.

Serokê Hevbendiya Niştimanî got ku Rûsya li dijî rola xwe li Encûmena ewlehiyê derdikeve, û bi rêjîma Esed re di pêkanîna tawanên cengê beşdar dibe, û helwesta rêjîmê di Encûmena ewlehiyê de xurt dike, ko çend cara Vîto bikar aniye, û ev gef e li ser aştî û ewlehiya navdewletî.

Jêder: Ofêsa Ragehandinê ya Hevbendiya Niştimaî

 

15 June 2019 In Nûçeyên Hevbendiyê

Ofîsa Karûbarên Penaberan ya Hevbendiya Niştimanî ya Hêzên Şoreş û Rikberiya Sûrî, civînek awarte li dar xist derbarê metirsî û rîska rewşa penaberên sûrî yên li Libnanê, piştî binpêkirinên ku li dijî wan bûn, û hîn jî berdewam in.

Û hejmarek ji endamên desteya siyasî û serokên ofîs û komîtan amade bûn, her weha serokê desteya şopandina karûbarên penaberên sûrî li Libnanê Abdulrehman Akarî , û rojnamevan û çalakvanê siyasî Ehmed Alqesîr jî beşdar bûn.

Û kesên civyayî rewşa xerab ya penaberên sûrî li Libnanê gengeşe kirin, di dema ku binpêkirin li dijî wan pirtir dibin, tevlî bûyerên kuştin û girtinê, her weha ruxandin û şewitandina hejmarek ji kampan û derbiderkirina bi hezaarên kesan û hiştina wan li çolan.

Û seroka Ofîsa Karûbarên Penaberan, Emel Şêxo, got ku tiştê vê dawiyê çêbûye, nimûneyek zelal e li ser dijminkariya ku gur dibe ya ku wezîrê derve yê Libnanê û berpirsyarên ku nûnertiya Hizbulah û rijêma Esed agirê wê geş dikin, û dît ku ev bi armanca tengavkirina penaberên sûrî û neçerkirina wan li ser vegera bi darê zorê bo Sûriyê.

Û Şêxo diyar kir ku ev dikeve xizmeta bercewendiyên Hizbullah de , dema ku penaberên sûrî dikin behane ji kirîzên berdewam ên abûriya Libnanê re, her weha dikeve bercewendiya rijêma Esed , da bibe wek kaxezeke fişarê li ser civaka navdewletî ji bo pejirandina mercan di mijara nûavakirinê de.

Û tekez kir ku ev binpêkirine ji biryarên navdewletî ên taybet bi penaberên sûrî li tevaya cîhanê re, û daxwaz ji netewên yekbûyî kir ji bo rawestandina tevaya dijminkariyan û nehêlana dubarekirina wan.

Û Şêxo bang da berpirsên libnanî ên li rex şoreşa sûrî rawestiyane ji bo berdewam bin di piştgiriya penaberên sûrî li Libnanê, û tevgereke berdewam bikin ji bo rawestandina gotara kîn û nijadperestiyê dijî penaberan, û spasiya xebata wan a di vî warî de kir, û got ku gelê Libnan û yê Sûriyê bi dehên salan derdê stemkariya rijêma Esed û destêwerdasna Îranê ya berfireh ya ziyan gihandiye aramî û hêminiya deverê dîtine.

Jêder : Beşê Kurdî ji Nivîsgeha Ragihandinê ya Hevbendiya Niştimanî

 

14 June 2019 In Nûçeyên Hevbendiyê

Cêgirê Serokê Hevbendiya Niştimanî ya Hêzên Şoreşê û Rikberiya Sûriyê, Bedir Camûs, piştrast kir ku kiryarên hinek aliyên Libnanê yên tengavkirina penaberên Sûriyê bi riya hilweşandina kampên wan û bûyerên êrîşkirinê heta bi pêkanîna tawanên kuştinê li deverên cuda, tên bi amanca neçarkirina wan li ser vegera li Sûriyê bi darê zorê, ku ev yek wê jiyana wan têxe di rîskek mezin de.

Camûs, îro di daxuyaniyek taybet de, ragihand ku Libnan bi rêya Hizbullah wêran bû, piştî yaxîbûna wê dijî dewleta Libnanê ya bi fermana Îranê û got ku divê em jibîr nekin rawestana rejîma Esed û Hizbullah li dijî projeyê hikûmeta yekîtiya niştimanî di destpêka 2011 de û berdewamiya wan heta vê gavê li ser danîna astengiyan li pêşiya damezrandina hikûmeta nû, û Libnan bi vê ket di bin barê krîzên aborî de, ku rêjeya bêkariyê bi awayekî nepêşbînîkirî bilind bû.

Camûs diyar kir ku Hizbulah hewl dide bi rêya belavkirina axaftinên kînê û nijadperestiyê li dijî penaberên Sûriyê ji bo bala xelkê biguherîne ji ser tawan û kiryarên xwe yên xirab li Libnanê yên ji bo berjewendiya Îran û Sûriyê, û tekez kir ku pirsgirêk bi man yan jî bi vegera penaberên sûrî çareser nabe, lê bi rêya rawestandina tawanên Hizbulah û çeteyên wê yên terorîst çareser dibe, bi taybetî tawanên wê yên ligel rejîma Esed li dijî welatiyên sivîl.

Camûs, Netewên Yekgirtî bi berpirsiyar dît li hember binpêkirinên dibin li dijî penaberên Sûriyê li Libnanê û ji NY daxwaz kir ku bilez bixebite ji bo parastina wan li gor biryarên navnetewî yên taybet li ser rewşa penaberan.

Cêgirê serokê Hevbendiyê got ku "girîngiyeke mezin heye bo destêwerdaneke navnetewî ya lezgîn û cidî bi awayekî yasayî ji bo pêşiyê bigire li ber berdewamiya pêkanîna binpêkirinan li dijî penaberên Sûrî", û bang li civaka navnetewî ji bo alîkariya Sûriya û Libnan û hemû welatên din yên tûşî destêwerdana xirab ji aliyê Îranê dibin ji bo têkdana asayîş û aramiya herêmê.

Camûs diyar kir ku şoreşa sûrî ligel miletê Libnanê heman daxwaz û projeye hene, yên ji bo rizgarîbûna jidest rejîma Esed ya dîktator û avakirina dewleteke demokrat û federal li ser bingeha dadwerî û yeksaniyê, û daxwaza alîkariyê ji bo penaberên Sûrî li Libnanê ji hêzên siyasî yên alîgirê gelê Sûriyê kir, ku pêşiyê bigirin li zilm û neheqiyê.

Wî bal kişand li ser giringiya redkirina bikaranîna penaberên Sûrî di nav pirsên siyasî yan jî di bazarên nemirovî de, û got: "Gelê Sûriyê reviyaye Libnanê ji tirsa kuştin û girtinê", û tekez kir ku vegerandina wan bi darê zorê û bê gerantî tê bi wateya şandina wan ji bo mirinê.

Wî got, ku her kes beşdar bibe di vegerandina wan de bi darê zorê, wê berpirsiyar be li ber dadgehên navnetewî, û tekez kir ku Hevbendiya Niştimanî dê xwe bigehîne wan dadgehên li gor û yasayên navnetewî yên parastina mafên penaberan.

Jêder: Ofisa Ragihandina Hevbendiya Niştimanî ya Sûrî

14 June 2019 In Nûçeyên Hevbendiyê

Serokê Desteya Danûstandinên Sûrî Nesir Elherîrî tekez kir ko rêjîma Esded û Rûsya di amanckirina herêmên niştecihan û yên zindîdar li herêmên kêmkirina şerî li bakurê Sûriyê berdewam in û pabendî bi çi agirbestê nekirine.

Elherîrî di nivîsa xwe ya li ser Tiwîterê roja înê anî ziman ko dîroka rêjîma Esed û Rûsya kirêt e, ko pabendî bi çi peyman û agirbestê nekirine.

Û diyar kir ko ‘’ gotin li ser agirbestê dibe û berevajî wê pêk tê‘’, û tekez kir ko operasiyona bombebaranê berdewam e, û vê hişt sivîl ji nav wan zarok li gund û bajarok û bajarên gundewarên Hema û Idlib û Laziqiyê bibin qurbanî.

Her weha mizgeftan nimêja înê ji tirsa ko ji hêla rêjîmê û Rûsya bêne amanckirin tune kirin. Çalakvanan diyar kirin ko firokên cengî ji asmanê herêmê neçûne û çend bajar û bajarok ji berbanga evro de amanc kirine.

Rêjîma Esed û hevalbendên wê hemû peyman û lihevkirinên agirbestê û yên derbasbûna alîkariyên mirovî an rakirina dorpêçê ji ser herêmên dorpêçkirî binpê kirine, her weha li himber hemû biryarên navdewletî yên ko dîtina çareseriyeke siyasî û ya sereke daxuyaniya Cinêvê û biryara 2254ê rawestiyane.

Hevbendiya Niştimanî ya Hêzên Şoreşê û Rikberiya Sûriyê daxwaz ji civaka navdewletî kir ko tevbigere tako sivîlan biparêze û nehêle tawan derheqê wan de pêk bên, ji ber bombebarana berdewam li ser herêma kêmkirina şerî û daxwaz kir ko peymana Idlibê ya agirbestê bête parastin, û pirosesa siyasî ji bo dîtina çareseriyeke siyasî ya dadwer aktîv bibe.

Jêder: Ofêsa Ragehandinê ya Hevbendiya Niştimanî

13 June 2019 In Nûçeyên Hevbendiyê

Hevbendiya Niştimanî ya Hêzên Şoreşê û Rikberiya Sûriyê, daxwaza rêzgirtina li peymanên navnetewî yên derbarê penaberan, û darizandina her kesê berpirsyar ê tevlî binpêkirinan kir, û da xuyakirin ku ew hemû daxuyaniyên kîn û nijadperestiyê yên derdikevin ji aliyê wezîrê derve yê Libnanê Cebran Basîl, û hin aliyên fermî li dijî penaberên Sûrî li Libnanê şermezar û red dikin.

Hevbendiya Niştimanî, îro roja pêncşemê di daxuyaniyekê de hişyardarî da ji encamên berdewamiya zêdegavî û navtêdana li dijî penaberên Sûrî û herwiha hişyarî da ji "beşdarbûna hin aliyan di belavkirin û bangeşa pêla kîn û nijadperestiyê ya xirab de, weke axaftinên wezîrê derve yê Libnanê Cebran Basîl, ku ew axaftin dê bi nerênî li xudanê xwe vegerin.

Hevbendiya Niştimanî got ku "welatiyên Sûrî ticarî helwesta rawestana birayên xwe yên Libnanî li kêleka wan di vê derdeseriya mezin de ji bîr nakin", û bal kişand ser xwepêşandana duh li Beyrûtê ji bo şermezarkirina kiryarên li dijî penaberên Sûrî, yên ji aliyê Hizbullaha terorîst pêk tên, a ku sedema sereke ya bobelata derbiderî û penaberiyê ye.

Li gorî daxuyaniyê , eger milîsên Hizbulah ji xaka Sûriyê venekişin û dest ji piştgiriya tawankariyên rejîma Esed û pêkanîna tawanên şer li welatê me bernedin, ti mifayek nîne ji daxwaza çareserkirina pirsgirêkên penaberên Sûriyê li Libnanê ji aliyekî bi tena xwe ve.

Daxuyaniyê bal kişand ku aliyên piştgirî û alîkariya planan tengavkirina penaberan û vegerandina wan bi darê zorê li Sûriyê dikin, weke berpirsyar tên dîtin li hember tawanên bibin ji aliyê rejîmê li dijî penaberan.

Hevbendiya Niştimanî daxwaz ji aqilmendan û di serî de ji serokê hikûmeta Libnanê Said Alherîrî kir, ku bi berpirsiyariya xwe ya mirovî û fermî rabin, weke tekst û prensîb û biryarên Netewên Yekbûyî û Komkara Erebî û peymanên ji aliyê Libnanê hatine îmzekirin, û kar bike ji bo danîna sînorekî ji van daxuyaniyên bi vî rengî re berî ku bibin sedema zirarên zêdetir yan jî bibe çirûskeke agir ku ti kes nikare encaman pêşbîn bike.

Hevbendiyê dupat kir li ser pêwîstiya rêzgirtina li yasa û peymanan, û rawestandina van daxuyaniyên tund, ku zêdegavî û binpêkirinên di derheqa penaberên Sûrî de têne bîra me, her ji kampanyên dozgeriyê û binçavkirinê heta bi wêrankirin û şewitandina konan, û radestkirina penaberên Sûrî ji bo hêzên rêjîmê.

Hevbendiyê diyar kir ku pêdiviyek praktîk û yasayî heye ji bo rawestandina berdewamiya van hilmet û daxuyaniyên xirab li dijî gelê Libnanê ji aliyê her aliyekî din.

Hevbendiya Niştimanî careke din daxwaza rêzgirtina li peymanên navnetewî yên derbarê penaberan kir, û darizandina her kesê berpirsyar ê tevlî binpêkirinan yan navtêdana li dijî penaberan, û mafên wan yên rewa binpê dike

Û da zanîn ku divê Netewên Yekbûyî û Komisyona Navnetewî ya Mafên Mirovan bi berpirsyariyên xwe rabin ji bo rê li ber binpêkirinên din û tawanên li dijî penaberên Sûriyê bigirin, û ji wan dixwaze ku tevbigerin ji bo rawestandina binpêkirinan û darizandina kesên berpirsyar.

Jêder: Ofisa Ragihandina Hevbendiya Niştimanî ya Sûrî

12 June 2019 In Nûçeyên Hevbendiyê

Seroka Birêveberiya Karûbarê penaberan ya Hevbendiya Niştimanî ya Hêzên Şoreşê û Rikberiya Sûriyê, Emel Şêxo, kuştina xortê Sûrî Zekeriya Xelîl Eltaha li Libnanê piştî ko derb li serê wî ketiye, pirotesto kir, û ji desthilata Libnanî daxwaz kir ku yekser vekolînê bike û berpirsiyarên bûyerê bike ber lêpirsînê.

Zekeriya yê ko li çayxanake libnanê li bajarê Seyda kar dikir, duh sibehê bi destê du xortên libnanî hate kuştin, û alavên ragehandinê diyar kirin ko her du xort serxweş bûn gava li pêşberî çayxanê rawestiyan û qehwe ji Zekeriya xwestin, lê piştî ko daxwaz derengî ma ew û zekeriya pev ketin û debançe berdan serê Zekeriya û kuşt.

Şêxo dibîne ko pareke mezin ji van tawanan dikeve hustê berpirsiyarên libnanî yên xwedanên dubarekirina gotara kînê , ji wan jî wezîrê derve Cibran Basîl, û tekez kir ku giring e gotarên nijaperestî lidijî penaberan rawestin û pabendî bi yasayên netewên yekgirtî bibe.

Û Şêxo bal kêşand ser ku rewşa gendeliyê li Libnanê ya salên bûrî, hiştiye areîşeyên abûrî mezintir bibin , û nabe ku ew penaberên Sûrî bikin sedem.

Herweha got ku beşdarbûna hizbullah( ya parek ji desthilatê ye ) di tawanên rêjîma Esed de li dijî sivîlan giringtirîn sedem e ko Sûrî koçber bibin.

Di dema dawî de zêdegavî û tawanên derheqê penaberên Sûrî li Libanê gelek caran çêdibin, digel daxuyaniyên nijadperestî ko berpirsiyarên Libnanî dibêjin, û tawanên kuştin û girtin û derîdadana dikanan hene.

Şêxo got tiştê derheqê penaberan dibe rêbazkirî ye, hişyarî da çi hewildanên neçarkirina Sûriyan bo vegera kotekî metisîdar in.

Jêder: Ofêsa Ragehandina Hevbendiya Niştimaî

11 June 2019 In Nûçeyên Hevbendiyê

Serokê Hevbendiya Niştimanî ya Hêzên Şoreşê û Rikberiya Sûriyê Ebdilrehman Mistefa dibîne ko tiştê li gundewarê Qamişlo dibe ji şewitandina dexlê xelkê ew jî ji tawankariyên cengê ye, û daxwaz ji civaka navdewletî kir ko têwerdanê bike û dabîn bike ko nema dubare bibe.

Mistefa evro sêşembê got: ‘’ şewitandina dexlê genim li cezîra Sûrî tawankariyên cengê ne,‘’ daxwaz ji civaka navdewletî kir ko kontrolkirina milîtanên PYD ko salixê wan bi “terorist” da ji ser herêma Cezîrê rake, û alîkariya yên ziyan li wan bûye bibe.

Serokê Hevbendiya Niştimanî got ku gerek biryarên navdewletî cîbicî bibin, û ya sereke daxuyaniya Cinêvê û biryara 2254 ya çareseriya siyasî beşek jê ye, û Sûriyê ji tiroristiya Esed û milîtanên din xilas bike.

Agir duhî duşembê dîsa bi zeviyên genim û ceh ket, û bêtir ji 28 gundan li gundewarê Qamişlo şewitîn, û ba agir guhast bi aliyê bakur û rojhelat ve, bi wê mezintirîn ziyan giha xelkên herêmê.

Çalakvanan tekez kirin ko dest li pey vî agirî hene û hîç ne ji rewşeke xwezayî wisa dibe û bi taybetî li çend herêman dubare bû.

Ji aliyê xwe ve berevaniya sivîl ya Sûrî ragehand ko ew bo vemirandina agiran amade ye, birêveberê berevaniya sivîl Raid Salih li ser Twiterê got: endamên rêkxistinê amade ne bo rewşa awarte û alîkariya sivîlan bikin û agir vemirînin ko gefê li ewlehiya xwarina Sûriyan dike.

Elsalih daxwaz ji dewletên têkilî bi mijarê ve hene kir ku rê li ber tîmên wî vekin tako bigehên herêmên agir bi wan ketiye û dê pisporiya tîmê di vemirandina agir de bikar bîne.

Çalakvanan bal kişandin ser ko xelkên herêmê ji dubarebûna bûyerên şewata bi destê kirdeyan û gihana wan bo herêmên din ditirsin, yên ko digel Reqa û gundewarê Helebê yê rojhelat depoya genimê Sûriyê ne.

Jêder: Ofêsa Ragehandinê ya Hevbendiya Niştimanî

Page 2 of 3
Home Nûçe Nûçeyên Hevbendiyê Items filtered by date: June 2019