Emîndarê Giştî yê Hevbendiya Niştimanî ya Sûrî Heysem Rehma, bang li civaka navdewletî, Netewên Yekbûyî û rêxistinên navdewletî kir ku tîmên pispor bişînin ji bo rakirina mayînan ku rojane bi dehan sivîlên bêguneh ji ber wan jiyana xwe ji dest didin.
Rehma di daxuyaniyeke rojnamevanî de bal kişand ser wê yekê ku rêjîma Esed ya têkçûyî tevî wêraniya ku li pey xwe hiştiye, bi dehhezaran mayin li navçe û parêzgehên Sûriyê çandine, zêdebarî li hebûna bi hezaran bermahiyên şer û mûşekên neteqiyayî.
Rehma diyar kir ku dema vegera Sûriyan bo welat û hewldana wan bo gihiştina cih û malên xwe yên wêranbûyî, bi dehan ji wan dibin qurbanî di encama teqîna mayin û roketên neteqiyayî, û got ku şiyanên xwecihî ne bes in ku pêşiya vê yekê bigirin û nehêlin ev felaket çêdibin.
Berevaniya Sivîl a Sûriyê , duh sêşemê, ragihand ku di encama 3 teqînên cuda yên mayînên ku rêjîma Esed û hevalbendên wê li dû xwe hiştibûn, kesek hat kuştin û 10 sivîlên din jî birîndar bûn li dora gundên Kebacib, Eşara û Hewayîc Şamiye yên gundewarên Dêra Zorê.
Herwiha Berevaniya Sivîl bal kişand ser wê yekê ku du sivîlên birayên hev di encama teqîna mînekê de ku ji aliyê rêjîma Esed ya berê ve hatibû çandin, duh li gundê Ebû Defna li gundewarê bajarê Maarat El-Numan li başûrê Idlibê, hatin kuştin.
Di raporta xwe ya dawî ya li ser qurbaniyên mayînan de, Berevaniya Sivîl kuştina 43 sivîlan, 8 zarok û jinek di nav wan de hene, û birîndarbûna 72 sivîlan bi birînên giran, 29 ji wan zarok in, di encama teqîna bermahiyên şer û mayinan de li herêmên Sûriyê, ji 27ê mijdara 2024an heta roja çarşemê 22ê kanûna paşîn a 2025an, belgeh kiriye.
Berevaniya Sivîl diyar kir ku tîmên rakirina bermahiyên şer zêdetirî 1060 bombeyên neteqyayî pûç kirin, û 134 zeviyên mayinkirî li parêzgehên Sûriyê ji 26ê mijdara 2024an heta 18ê kanûna paşîn 2025an destnîşan kirin, ji bo parastina sivîlan û ewlekirina vegera wan bo cih û warên wan ên jê hatine koçberkirin.
Jêder: Ofîsa Ragihandinê ya Hevbendiya Niştimanî ya Sûrî
