Derbarê serdana şanda serokatiyê a Encumena Niştimanî ya Kurd bo Herêma Kurdistanê, herweha gera ku şande li ser Encumenên Xwecihî yên ENKSê pê rabû, û hin mijarên din derbarê çalakiyên Encumena Niştimanî ya Kurd, me ev hevpeyvîna taybet bi “Fesla Yûsif ” re Cîgira Serokê Encumena Niştimanî ya Kurd li Sûryayê çê kir:
-Berî demekê serokatiya Encumena Niştimanî ya Kurd (ENKS) serdana Herêma Kurdistanê kir, û bi serok Mes`ûd Berzanî re civiya, çi di wê civînê de çêbû?
Serdana me ji Herêma Kurdistanê re bi vexwendinekê ji Birêz Mes`ûdê Berzanî Serokê Herêma Kurdistana Iraqê bû, me jê re rewşa deverên Kurdî bi awayekî berfireh şîrove kir, û bi taybet astengî û kelemên ku Partiya Yekîtiya Dimuqrat (PYD) ji tevgera siyasî û ji millet bi giştî re derdixîne.
Lê hêza Pêşmerge ya Kurdên Sûrî mijara sereke ji hevdîtinê re bû, Serok Berzanî ji me re tekez kir ku ev hêz ji kurdên Sûryayê pêk tê, hatiye rahênandan û meşqkirin da berevaniyê di ber deverên Kurdî de bike, û ew bi Encumena Niştimanî Kurdî ve girêdayî ye, herweha serok soz da me ku alîkariyên mirovahî bişîne da ku Encumen wergire û li welatiyan belav bike.
– Piştî Kongirê Encumena Niştimanî ya Kurd ê sêyem we serdana hemû Encumenên Xwecihî ên bi Encumenê ve girêdayî ne kir, mebest ji wan serdanan çi bû, û çima hûn derbas nebûn Kobanî?
Ev cara yekem e ku serokatiya Encumenê bi vê çalakiyê radibe û serdana nivîsgehên xwe yên xwecihî dike.. Bê guman mebesta me ji bilî danûstandinê û şîrovekirina rewşa siyasî û aktîvkirina Encumenên Xwecihî, hildana moralê xwecihên Encuman bû.
Me dixwest em derbas bibin Kobanî, ta em nivîsgeha Encumena Xwecihî lê vekin û xwecihiya wê ji nû ve aktîv bikin, lê me tu soz bo vegera Tirkiyê di riya deriyê fermî re ji Waliyê Sirûcê wernegirt. Lewra em li bajarê Orfayê bi Encumena Xwecihî a Kobanî re civiyan.
– Şandek ji Emaneta Giştî a Encumena Niştimanî ya Kurd bi Desteya Siyasî a Hevbendiyê re civiya, encamên vê civînê çi bûn?
Şandina şandekê ji Sekretariya Giştî bo hevdîtina bi Desteya Siyasî a Hevbendiyê re ji biryarên kongirê me yê sêyem bû, mebesta wê çesipndina belgeya di nevbera Encumen û Hevbendiyê de emzekirî ye bû, da wê belgeyê derbasî nerîna siyasî a Hevbendiyê bikin.
– Tirkya Hewl dide devereke aram li Bakurê Sûryayê ava bike, helwesta Encumena Niştimanî ya Kurd ji vê deverê çi ye?
Helwesta Encumena Niştimanî ya Kurd zelal e, em bi avakirina deverên aram li Sûryayê re ne, bi çavdêriya Civaka Navdewletî .. lê ne tenê ji hêla Tirkiyayê ve
