Serokê Hevbendiya Niştimanî ya Sûrî Hadî El-Behra, hevdîtinek li gel berpirsê karûbarê Yekîtiya Ewropî bo Sûriyê Michael Unmacht û şanda pê re pêk anî û pê re pêşhatên siyasî û meydanî yên dawî li Sûriyê gotûbêj kirin.
Di civînê de Cîgirên Serok Ebdulmecîd Berekat, Dîma Mûsa, Ebdulhekîm Beşar, Sekreterê Giştî Heysem Rehma û Kordînatorê Ofîsa Derve Ebdul Ehad Stêfo amade bûn.
Di civînê de behsa pêşhatên niha li Sûriyê hat kirin, bi taybetî piştî destpêkirina operasiyonên leşkerî yên vê dawiyê, û gotûbêj li ser encamên siyasî û mirovî pêk anîn, bi taybetî dilaramkirina sivîlan û giringîdana hêminî û selameta wan a kesane û parastina mal û milkan, her weha guhdana avamana dezgehên giştî û ji nû ve bikaranîna sazî, rêveberiyên xizmetguzariyê û dezgehên giştî, û hiştina xebatkarên ofîsan li ser karên wan da erkên xwe bi cih bînin.
Hevbendiya Niştimanî tekezî li ser giringiya ku civaka navdewletî bi rêya Encûmena Ewlekariyê kar bike ji bo aktîvkirina piroseya siyasî ya ko ji aliyê Netewên Yekgirtî ve hatiye sponserîkirinin li ser bingeha daxuyaniya Cinêvê û biryarên 2118 û 2254 yên Netewên Yekbûyî kir.
Serokê Hevbendiya Niştimanî Hadî El-Behra jî tekez kir ko çareseriya siyasî ya giştgir tekane rê ye ji bo bidawîkirina azarên xelkê û yekkirina xak û gelê Sûriyê, û tekez kir ku ti rê ji vê pêve nîne ji bo misogerkirina pêkanîna veguhestina siyasî bi rêya avakirina desteyeke rêveberî ya veguhêz ku xwedî desthilatên cîbicîkar ên tam be ku daxwazên Sûriyan yên ji bo dadmendî, azadî û demokrasiyê pêk bîne.
El-Behra tekezî li ser girîngiya rêveberiyeke bibandor li herêmên rizgarkirî û rola encumenên xwecihî, yekitiyan, komeleyan û odeyên pîşesazî û bazirganiyê yên xwecihî yên ji xelkên herêmê bi xwe û rola wan jî di qonaxa veguhêz de, ji bo peydakirina dahatan û bicîanîna kar tekez kir, û bal kişand ser ku Hevbendiya Niştimanî mekanîzmayên kar û awayê serederiya bi sivîlan re bi riya endamên xwe yên li Helebê ji nêzîk ve dişopîne.
El-Bahra got: “Em her dem tekezîyê li ser pêwîstiya rêzgirtina mafên sivîlan û dabînkirina ewlekarî û aramiya wan dikin, em jî ligel fesîleyan kar dikin ji bo bihêzkirina vê rêbazê û dabînkirina aramî û vegera li navçeyên rizgarkirî, û em vê yekê dibînin û di pratîkê de hatiye pêkanîn.”
El-Behra bal kişand ser wê yekê ku bajarê Helebê duyemîn bajarê herî mezin ê Sûriyê ye ji aliyê nifûs û curbecurbûnê ve, û weke her bajarekî li cîhanê, herweha rewşên taybet ku tê de ne, hin kesên xerab û tawankar hene, lewra kar ji bo nehiştina tawanan li gor yasayê hene.
Herwiha Hevbendiya Niştimanî tekezî li ser pêwîstiya standina tedbîrên bibandor ji bo rêgirtina li armanckirina rêjîma Esed li ser sivîlan û navendên giştî kir, û pêwîstiya bilindkirina asta alîkariyên mirovî û pirojeyên saxlembûna zû.
Ji aliyê xwe ve, birêz Michael Unmacht dilgiraniya Yekîtiya Ewropayê hember pêşhatên dawî nîşan da û tekez li ser pêşketina ber bi agirbestê û destpêkirina piroseya danustandineke cidî li ser bingeha piroseya siyasî ya bi sponseriya Netewên Yekgirtî û nûnerê wê yê taybet kir.
Herwiha tekez kir ku gereke Yekîtiya Ewropî berdewam be di pêşkêşkirina piştgiriya mirovî û alîkariyên mirovî ji gelê Sûriyê re, û ku ew dê ber bi pirojeyên vejandina zû li Helebê û navçeyên mayî ve biçe, û tekezî li ser giringiya başkirina sîstemên îdarî û birêveberiyê li ser sîstema demoqratî kir ku li tevahiya Sûriyeyê bibin nimûneyek ku jê bê hînkirin.
Jêder: Ofîsa Ragihandinê ya Hevbendiya Niştimanî ya Sûrî
