Serokê Hevbendiya Niştimanî ya Sûriyê Hadî El-Behra îro înê civîneke ji dûr de li gel nûnera taybet ya Birîtanya di dosya Sûriyê de Anne Snow pêk anî û pê re behsa pêşhatên bûyeran, rewşa mirovî û mafên mirovan û qonaxa veguhêz piştî rûxana rejîma berê kir.
Di civînê de Cîgira Serok Dîma Mûsa, endamên desteya siyasî Ebdul Ehed Estifo û Anas El Abdeh her weha skretêra Siyasî ya Wezareta Derve ya Brîtanya Antonia Murray beşdar bûn.
Kesên amade behsa rewşa mirovî û siyasî li Sûriyê di dema niha de gengeşe kirin, û serokê Hevbendiyê tekezî li ser rewşa disîplînê di nav rêzên aliyên leşkerî de, rêzgirtina mafên mirovan di danûstandinên wan bi sivîlan re û berdewamiya hikûmeta rêvebirina kar ya demkî di dabînkirina xizmetên bingehîn ji welatiyan re kir.
Beşdaran tekez kirin ku qonaxa veguhêz yek ji qonaxên girîng di dîroka her welatekî de tê dîtin, û tekezî li ser giringiya hevahengiya helwestên civaka navdewletî ji bo misogerkirina cîbicîkirina pîvanên avakirina hikûmeta veguhêz ên di biryara 2254 (2015) de ne, bi mercê ku ew hikûmet berfireh û cihê baweriyê be û ne li ser bingehên mezhebî be, û pêwîstiya pabendîya bi hebûna nexşeyeke demî ji qonaxa veguhêz re.
Amadebûyan tekezî li ser giringiya zêdekirina alîkariyên mirovî kirin ji bo sînordarkirina xirabûna rewşa mirovî li Sûriyê, nemaze bi hatina zivistanê û kêmbûna mazotê û madeyên germkirinê re, û pesna hewlên civakên xwecihî ji bo birêxistinkirina ewlehiyê û pêşkêşkirina xizmetguzariyan dan.
Ji aliyê xwe ve, Şandera Birîtanya ya taybet bo dosyaya Sûriyê Anne Snow tekezî li ser pabendbûna welatê xwe bi piştgiriya proseya veguhestina siyasî ya berfereh, li gorî biryara 2254 û pîvanên ku tê de hene kir.
Herwiha tekezî li ser piştgiriya xwe ji daxuyaniyên vê dawiyê yên Koma Heft (G7) û bizavên navdewletî ji bo hevahengkirina alîkariyên mirovî, û pêwîstiya karkirina ligel hemû aliyên navçeyî û navdewletî ji bo pabendbûna bi cîbicîkirina biryarên Netewên Yekbûyî derbarê pirsa Sûriyê kir.
Jêder: Ofîsa Ragihandinê ya Hevbendiya Niştimanî ya Sûrî
