Sindoqa finansekirinê ya ji bo nûavakirina Sûriye perepêdana hejmarek projeyên giring li deverên rizgarkirî pesend kir, ku heta niha nirxê projeyên ku ji hêla sindoqa finansekirinê ve hatine pejirandin gihiştiye nêzîkî 148.4 milyon Euro yî.
Ev yek hat di civîna 22’emîn de ya Komîteya Birêvebiriyê ya sindoqa finansekirinê, ku li roja pêncşemê li bajarê “Prague” paytexta Çîk hate lidarxistin, bi amadebûna nûnerê Hevbendiya Niştimanî ya hêzên şoreş û rikberiya Sûriyê, Hadî al-Behra û nûnerê hukûmata demkî, Yasir al-Hacî.
Civînê bal kişand li ser şopandina projeyên têne perepêdan ji hêla sindoqa spartinê li deverên rizgarkirî, û herweha hin projeyên nû hatine gotûbêjkirin.
Al-Behra diyar kir ku di civînê de çend projeye û budçeyên wan li deverên rizgarkirî hatin pesendkirin, û bal kişand ku destpêka bicîhanîna van projeyan dê bandorek erênî li ketwarê xizmetgozariyên têne pêşkêşkirin ji xelkê wan deveran re bike.
Al-Behra bal kişand ku piştgiriya van projeyan dê bibe destpêkek ji bo hejmarek projeyên din yên ku plan ji wan re têne danîn ji bo pêkanîna wan ji aliyê hikûmeta demkî ya Sûrî ve, û got: “Berpirsyariyeke mezin dikeve li ser milê civaka navnetewî ji bo dabînkirina ewlehî û aramiyê li deverên derveyî kontrola rejîmê, ku wê van deveran ewle bike û rewşa wan baştir bike, û dibe bibe fakter ji bo vegera koçber û penaberan li cih û warên xwe”.
Yek ji wan projeyan piştgiriya Parastina Sivîl e, ji bo paqijkirina kavil û mayînan li heşt bajar û bajarokên gundewarê Helebê, û projeyek ji bo saxbîrîkirin û amadekirina ambar û sarincên şînî ye li devera bajarê Mar’h.
Herweha projeyek ji bo avakirina klînîkên tenduristiyê yên tênguhestin e, û projeyek ava vexwarinê ya paqij ji bo gundewarê parêzgeha Reqa hate pesendkirin, û kujmê van projeyan bi qasî 8,3 mîlyon Euro ye.
Hêjayî gotinê ye ku Hevbendiya Niştimanî serokatiya Encûmena Birêvebirina sindoqa finansekirinê dike, ya di sala 2013’an de hate damezirandin, û herweha Almanya, Amerîka, Îmarat , Fransa, Kuwait, Japonya, Danîmarka, Italya, Tirkiye û Urdunê, têde endam in.
Jêder: Ofîsa Ragihandina Hevbendiya Niştimanî Sûrî
