Desteya siyasî ya Hevbendiya Niştimanî ya Sûrî, îro pêncşemê, civîna xwe ya asayî lidar xist, tê de pêşhatên meydanî û rewşa siyasî li Sûriyê û guhertinên bilez li Rojhilata Navîn û bandora wan li ser rewşa Sûriyê gotûbêj kirin.
Serokê Hevbendiya Niştimanî Hadî El-Behra, di vê civîna asayî de kurteyek nirxandinê li ser civînên xula 73yemîn ên Desteya Giştî pêşkêş kir, tê de behsa xebata Girupa Karê Yasayî û Mafên Mirovan û piroje û pêşniyarên wan ên yasayî ên ku wek çareseriyekê ji hejmarek pirsgirêkên yasayî û rêvebirî re pêşkêş kirine kir.
El-Behra ragihand ku Desteya Siyasî di civînên berdewam de ye, ji bo şopandina pêşhatên bilez ên li herêmê û bandora wan li ser Sûriyê, her weha şopandina cîbicîkirina plana stratejîk a ku di civîna dawî de ji aliyê Desteya Giştî ve hatiye biryardan.
El-Behra desteya siyasî bi encamên şêwir û hevdîtinên ligel Encûmena Niştimanî ya Kurdî agahdar kir, ew hevdîtinên ji bo çareserkirina pirsgirêkên ku Encumen behsa wan kiriye hatibûn lidarxistin.
Û cîgirê serok Ebdilmecîd Berekat kurteyek pêşkêş kir, tê de behsa civîna ligel Rêxistina Berevaniya Sivîl a Sûrî kir, ya ji bo pêşxistina planekê derbarê çalakî û xebatên hevbeş, her weha li ser civîna ligel hejmarek ji endamên Yekîtiya Xwendekarên Sûrî li bajarê Stenbolê axivî.
Ji aliyê xwe ve Cîgira Serok Dîma Mûsa kurteyek li ser çalakiyên Desteya Jinan a Sûrî û hevdîtinên wê yên bi Hevbendiya Niştimanî re li kêleka civînên Desteya Giştî li Urfaya Tirkîyê pêk anîne pêşkêş kir.
Di civînê de amadebûyan behsa dosya siyasî kirin, bi taybetî li ser şiroveya nûnerê Netewên Yekgirtî bo Sûriyê Geir Pedersen rawestiyan, her weha li ser dosya reva penaberên Sûriyê ji Libnanê ber bi Sûriyê ve ji ber êrîşên asmanî û mûşekî li çend deverên Libnanê û hewlên rêjîma Esed ji bo sûdwergirtina ji van rewşan li ser asta siyasî ya navdewletî, û Endamên desteya siyasî di gotûbêjên xwe de bal kişandin li ser rêyên dabînkirina ewlehî û saxlemiya penaberên li Libnanê, her weha yên ku ji ber rewşa dijwar neçar mane ku ber bi Sûriyê ve birevin.
Di civînê de li ser gurkirina leşkerî ya hêzên Israîla dagîrker ên li dijî destikên leşkerî yên Îranê li navçeyê, û bandora hilbijartinên Amerîkayê li ser navçeyê û projeyên namzedên wan ên hevrik derbarê devera Rojhilata Navîn hat rawestan.
Her weha amadebûyan behsa proseya aştiyê ya ku di parlementoya Tirkiyê de hatiye pêşniyarkirin û bandora wê li ser dosyayên girêdayî pirsa Sûriyê kirin, û tekezî li ser giringiya şopandina van pêşhatan ji bo xwe-amadekirina ji çend senaryoyên ku heye berê deverê bidin rewşeke nû kirin.
Jêder: Ofîsa Ragihandinê ya Hevbendiya Niştimanî ya Sûrî
