Serokê Hevbendiya Niştimanî ya Sûrî Hadî El-Behra, hemû êrîşên Israîla dagirker li ser dewleta Sûriyê û jêrxana civaka wê şermezar dike, bi taybet di vê rewşa krîtîk a ku gelê Sûriyê têre derbas dibe de.
Di hevpeyvînekê de ligel BBC, El-Behra daxwaz ji civaka navdewletî kir ku tedbîrên guncaw bistîne ji bo vegerandina pabendbûna bi hemû rêkeftinên berê yên di navbera Sûriyê û dewleta dagîrker de, di nav wan de rêkeftinên agirbestê yan jî rêkeftinên xeta rawestana şer yên di sala 1974 û 1949an de hatine îmzekirin.
Di çarçoweya pêşhatên navxweyî de, El-Behra tekez kir ku pêşîneya îro kontrolkirina ewlehiya Sûriyê û dabînkirina ewlehîyê û parastina welatiyan ji hemû pêkhate û mezhebên navxwe ye, û herwiha giringiya dabînkirina xizmetguzariyên serekî bi awayekî bê rawestan.
El-Behra bal kişand ser wê yekê ku li gorî nexşerêya ku di daxuyaniya Cinêvê û biryarên 2118 û 2254 de hatiye, ji bo avakirina saziyên hikumraniya veguhêz, xalên bingehîn hene, û destnîşan kir ku ew xal ev in: Hemû aliyan li xwe bigire, cihê baweriyê e, li gorî nexşedemeke diyarkirî û ne li ser bingeha mezhebî be.
El-Behra diyar kir ku Hevbendiya Niştimanî îro li Şam û Helebê amade ye û danûstandinê bi hemû pêkhateyên civaka Sûriyê re dike, bi armanca ku aliyên berfireh beşdar bibin, û tekezî li ser wê yekê kir ku desteya rêveberiya veguhêz dive berfireh be û ti kesî dûr nexe.
El-Behra diyar kir ku daxuyaniya Cinêvê wek nexşerêyeke berfireh û zelal e, û daxuyaniyên opozîsyona Sûriyê, çi Konferansa Qahîre û çi jî konferansên din, zelal in derbarê sîstema hikûmeta dahatû ya Sûriyê ku sîstemeke firealiya siyasî ye, li ser bingehên demokrasiyê û veguhestina aştiyane ya desthilatê bi hilbijartinên azad û adilane ava dibe.
Jêder: Ofîsa Ragihandinê ya Hevbendiya Niştimanî ya Sûrî
