Serokê Hevbendiya Niştimanî Sûrî Hadî El-Behra, daxwaz ji Komîseriya Bilind a Netewên Yekgirtî ya Karûbarên Penaberan, UNHCR kir, ku bilez parastina navdewletî ji penaberên Sûrî yên ku ji Libnanê reviyane deverên di bin kontrola rêjîma Esed û alîgirên wê de re peyda bike, ji ber li wê derê bi awayekî keyfî tên girtin. Û tekezî li ser wê yekê kir ku çênabe ew di nav du bijardeyan de bimînin ku herddû jî gefê li ser jiyana wan çêdikin.
El-Behra wiha got: “Em dosya rewşa krîtîk û awarte ya penaberên sûrî yên ku ji ber şer ji Libnanê reviyane pêşkêşî Neteweyên Yekbûyî, Sekreterê wê yê Giştî, Encumena Ewlekariyê û rêxistinên pêwendîdar bi karûbarên penaberan dikin, ku li gorî raporên saziyên mafên mirovan ên Sûrî, rejîma Esed di meha îlonê de 9 kesên ku ji neçarî vegeriyane Sûriyê girtine.
Di îlona bûrî de rêjîma Esed stratejiya xwe ya tepeserkirinê berdewam kir, û li gorî ku Tora Sûrî ya Mafên Mirovan piştrast kiriye, rêjêmê 128 kes girtine, 4 zarok û 16 jin di nav wan de hene, û Elbehra tekez kir ku Sûriya ji ber hebûna rêjîma Esed û nebûna çareseriyeke siyasî ya dadmend ne ewle ye, û tekez kir ku divê civaka navdewletî di civînên navdewletî de giringiyê bide dosya girtiyan û bi tundî fişarê bike ji bo azadkirina wan û nehêle rêjîm wan wek alaveke fişarê bikar bîne.
Her wiha El-Behra siyasetên hikûmet û şaredariyên Libnanê û fermanên wan ên rêvebirî yên bêmînak, ne rewa dîtin û rexne kirin, û tekez kir ku penaberên sûrî li Libnanê rûbirûyê gelek astên cudakariyê dibin, û dît ku ev şerm e ji mirovatiyê re û tawanek li dijî mirovahiyê ye.
El-Behra bal kişand ser wê yekê ku hatiye qedexekirin ku rêxistinên mirovî û rêxistinên sivîl ên xwecihî û yên sûrî û navdewletî li Libnanê cîh ji penaberên sûrî re peyda bikin, her weha nahêlin alîkariyên xwarinê bighên wan, û pêşkêşkirina her cure alîkariyên pizîşkî û ya lezgîn ji wan re qedexe ye.
Jêder: Ofîsa Ragihandinê ya Hevbendiya Niştimanî ya Sûrî
