Serokê Hevbendiya Niştimanî ya Sûrî Hadî El-Behra, tekez kir ko Hevbendiya Niştimanî piştgiriya hikûmeta demkî dike, ya ku ji bo dabînkirina pêdawîstiyên serekî, berdewamiya pêşkêşkirina xizmetguzariyan û karê dezgehên dewletê û nehiştina rûxandina wan herweha dabînkirina ewlehiya welatiyan hatiye avakirin.
El-Behra di hevpeyvînekê de ligel kanala El-Erebiye ragihand, ku Hevbendiya Niştimanî ya Sûrî kar dike ji bo piştgiriya navdewletî ya pêwîst ji hikûmeta Mihemed El-Beşîr re peyda bike.
El-Behra tekez kir ku Hevbendiya Niştimanî beşek sereke ji prosesê ye, ji ber ku komên Artêşa Niştimanî ya Sûrî ku beşek in ji Hevbendiya Niştimanî, di odeya operasyonên leşkerî yên hevbeş de bûn û beşdarî di rizgarkirina Sûriyê de kirin, û Hevbendiya Niştimanî karê xwe yê siyasî bi temamî dike.
El-Behra amaje bi wê yekê kir ku daxuyaniyên Hevbendiya Niştimanî di heyama borî de hatine belav kirin, hatine şêwandin, û diyar kir ku Hevbendiya Niştimanî daxwaza cîbicîkirina tiştê mayî ji biryara 2254 dike derbarê proseya veguhestina siyasî de ku di xala 4ê ya biryarnameyê de hatiye diyarkirin, wek nexşerêya ku bihêle xelk xwe birêve bibin, ji ber ku yê ku di cîbicîkirina vê biryarê de bû asteng, rêjîma Esed bû, û got ku piştî rûxandina rêjîmê, cîbicîkirina biryarê tenê ji aliyekî ve ye ku hêzên siyasî, leşkerî û sivîl ên şoreşê ne.
El-Behra bal kişand ser wê yekê ku cîbicîkirina biryarê berjewendiyek hevbeş a gelê Sûriyê ye, û ew dê bibe piroseya diyaloga Sûrî-Sûrî, di navbera hêzên şoreşger û opozisyonê û hemû pêkhateyên gelê Sûriyê de bêyî ku ti kesî ji xwe dûr bixe.
Û tekez kir ku giringiya biryarê ew e ku wê pîvanên avakirina desteya rêveberiya veguhêz diyar kirin, li gorî kar û dema wê, û pêwîstiya wê bi wê yekê ku hemû Sûriyan di nav xwe de bihewîne, û pêbawer be û ne li ser bingeheke mezhebî û di çarçoveya demeke naskirî de be.
Derbarê naveroka biryara 2254 de, El-Behra amaje bi wê yekê kir ku beşa yekem a biryarnameyê ku xala danûstandinê di navbera her du aliyan de dihewîne, bi rûxandina rêjîmê re cihê wê nemaye û niha tenê yek alî heye, lê wî tekez kir ku beşê duyem ê biryarê neguheriye, û behsa qonaxa veguhêz ber bi Sûriyeya paşerojê ve bi destûr û sîstema wê ya nû ya demokratîk dike.
Derbarê peywendiya di navbera Hevbendiya Niştimanî ya Sûrî û Desteya Operasyonên Leşkerî de, amaje bi wê yekê kir ku di qonaxa veguhêz û avakirina desteya rêveberiya veguhêz de dê danûstandin di asteke baş de be, ji ber ku divê em bi yekrêzî kar bikin, û Hevbendiya Niştimanî hewil dide ku demekê ji bo hevdêtina di navbera serkirdayetiya hevbendiyê û serkirdayetiya Desteya Operasyonên Leşkerî de destnîşan bike.
Serokê Hevbendiyê diyar kir ku cîbicîkirina biryara 2254 ya mayî dê alîkariya rakirina sizayan ji ser Sûriyê bike, ku em ji niha ve daxwaza rakirina wan dikin, ji ber ku rêjîma tawankar hatiye derxistin û serokê wê ji welat reviyaye her weha ew yek dê piştgirî û veberhênanê li Sûrîyê çêbike, û îro pêdivî bi piştgirîya hemî bira û hevalan heye.
Jêder: Ofîsa Ragihandinê ya Hevbendiya Niştimanî ya Sûrî
