Serokê Hevbendiya Niştimanî ya Sûrî Hadî El-Behra, bi tundî kampaniyên hin nijadperestên ku gotara nefretê û gotegotên xerab li dijî penaberên Sûriyê li Tirkiyê û welatên din ên penaberiyê belav dikin, û pêkanîna kiryarin xerab ku ziyan gihandin mal û milkên kesane şermezar kirin.
El-Behra her wiha bi tundî armanckirina şofêrên kamyonên Tirkiyê li hundirê Sûriyê şermezar kir û bang li gelê Sûriyê yê li Tirkiyê û navçeyên rizgarkirî kir ku divê xwegirtî bin û dûrî gotar û kiryarên tevlîheviyê çêdikin bin da ew jî nekevin şaşiyên heman gotara nefretê ya ku ziyan gihandiye wan.
El-Behra amaje bi wê yekê jî kir ku pêwîst e derfet neyê dayîn ji bo têkdana aramî û ewlehiyê li navçeyên rizgarkirî û li Tirkiyê û tekez kir ku rêjîma Esed û rêxistinên terorîst tenê sûdmend in ji van alozî, binpêkirin û tevlîheviyan, herdû aliyên bûne sedema koçberkirina bi milyonan Sûrî ji cih û warên wan û hewl didin pêwendiyên biratî yên di navbera gelên Sûriyê û Tirkiyê de yên ku xwîna şehîdên wan di şerên hevbeş ên li dijî milîsên terorîst de tevlihev bûye têk bide.
El-Behra tekez kir ku bi van helmetan dixwazin astengiyên zêdetir li pêşiya Sûriyan deynin da negihêjin armancên xwe yên azadî, dadmendî, rûmet û demokrasiyê ku ji bo wan serî hildan û qurbanî dane.
Serokê Hevbendiya Niştimanî tekezî li ser giringiya daxuyaniyên Serokomarê Tirkiyê Receb Teyib Erdogan kir, ku tê de ev kampaniya kiryarên xerab şermezar kirin û tekezî li ser karê desthilata Tirkiyê li ser asta herî bilind kir ji bo rawestandina wan binpêkirinan û dabînkirina ewlehî û aramiya hemwelatiyên Tirkiyê û penaberan, wek wezîrê navxwe yê hikûmeta Tirkiyê jî tekezî li ser kiriye.
El-Behra spasiya endamên hikûmet û parlementoya Tirkiyê kir ku nerazîbûna xwe anîne ziman li hember wan kiryarên xerab ên ziyan gihandine xelkê bêguneh, û xebata wan a bêwestan ji bo rawestandina wan kiryaran û dadpirsîna berpirsên wan.
Jêder: Ofîsa Ragihandinê ya Hevbendiya Niştimanî ya Sûrî
