Emîndarê giştî yê Hevbendiya Niştimanî ya Sûrî Heysem Rehma, spasiya Ukraynayê kir li ser niyeta wê ya şandina dexl û dan û berhemên çandiniyê yên din bi armancên mirovî ji Sûriyê re, û tekez kir ti carî gelê Sûriyê vê helwesta exlaqî di vê qonaxa krîtîk a ku Sûriyê têre derbas dibe de ji bîr nake û dê hetahetayê di bîr û bala wî de bimîne.
Emîndarê giştî di daxuyaniyeke rojnamevanî de tekez kir ku pêwîstiya Sûriyê bi piştevaniya bira û dostên xwe heye ji bo dabînkirina ewlehî û xizmetguzariyan ji xelkê re, û herwiha pêwîstiya wê bi piştevaniya navdewletî heye ji bo pêkanîna veguhetina desthilatê bi awayekî aştiyane .
Duh, yekşemê, Serokê Ukraynayê Volodymyr Zelensky niyeta xwe ya şandina dexl û dan û berhemên din ên çandiniyê bi armanca mirovî ragihandibû, piştî hefteyekê ji rûxandina rejîma Beşar Esed.
Zelensky di axaftina xwe ya rojane de got:”Niha em dikarin bi şandina genim, ard û zeyta xwe alîkariya gelê Sûriyê bikin, ew berhemên me yên ku li seranserê cîhanê ji bo dabînkirina ewlehiya xurekê tên bikaranîn,”
Wî diyar kir ku barên alîkariyê yên texmînkirî dê bibin beşek ji bernameya “Dexl û Danê Ukrayna”, ku di sala 2022an de dest pê kiriye da ku alîkariya xurekî ji welatên herî hewcedar re peyda bike.
Jêder: Ofîsa Ragihandinê ya Hevbendiya Niştimanî ya Sûrî
