Daxuyaniya Rojnamevanî
Di dema ku Hevbendiya niştimanî ya Sûrî karê xwe piştî rûxandina rêjîma tawankar didomîne, ji bo bi temamî bigihêje armancên şoreşê û daxwazên gelê Sûriyê yên dadperwerî, azadî û demokrasiyê, van xalên li jêr zelal dike:
• Bi rûxandina rêjîma ku bi awyekî leşkerî hilweşiya, cîbicîkirina biryara 2254 tenê bi pêkhateyên Hêzên Şoreşê sînordar bûye, ku nûneratiya aliyên siyasî, sivîl û leşkerî ji hemû pêkhate û mezhebên gelê Sûriyê dikin, bêyî hebûna nûnertiya Rêjîma têkçûyî ji ber hilweşîna wê, ev tê wateya ku ti aliyek ku bikaribe rêgiriyê li bicîanîna wê biryarê bike tune ye, û bicîanîna wê di zûtirîn dem de di berjewendiya gelê Sûriyê de ye.
• Hevbendiya Niştimanî ya Sûrî, red dike ku ti alî biryara Sûriyê û gelê wê yê azad û serbilind li xwe bigre, û tekez dike ku cîbicîkirina biryara Encûmena Ewlekariyê ya 2254 li gor teksta wê di rêya piroseseke siyasî ya ku gelê Sûriyê bi xwe serpereştiya wê dike re ye, bi rêya diyaloga Sûrî, û bi ti awayî ji aliyê Netewên Yekgirtî ve neyê kontirolkirin, û biryar maf nade rêxistina navdewletî ku ew serpereştiya proseya siyasî bike, ji ber ku rola wê bi pêşkêşkirina asankarî û şêwirmendî û pisporiyê sînordar e, eger hewcedarî hebe û sûrî bi xwe daxwaz bikin.
• Hevbendiya Niştimanî piştgiriya hikûmeta demkî dike ya ku ji aliyê Mihemed El-Beşîr ve hatiye avakirin piştî rûxandina rêjîma ku bi awayek leşkerî hilweşyaye, ji ber pêwîstiya hebûna desthilateke cîbicîkar ya demkî ji bo berdewamiya karê saziyên dewletê û pêşkêşkirina xizmetguzariyan ji xelkê re heta destpêka adara bê, wek ku di daxuyaniya damezrandina wê de hatiye nivîsîn.
• Biryara Encumena Ewlekariyê pîvanên avakirina desteya rêveberiya veguhêz (hikûmeta veguhêz) diyar dike û her deste, encûmen, an meclîsa damezrîner a ku di qonaxa veguhêz de were avakirin, divê pêkhateyên gelê Sûriyê tevan li xwe bigire, cihê baweriyê be û ne mezhebperest be.
* Di biryarê de, erkên ku divê Desteya Hikimraniya Veguhêz (Hikûmeta Veguhêz) bi cih bîne, ev in:
1. Dariştina destûra nû, ku hikûmeta veguhêz dê asankariyê ji bo hilbijartin an jî avakirina meclisa damezrîner peyda bike ji bo nivîsandina destûra nû ya Sûriyê.
2. Dabînkirina jîngeheke ewle û bêalî ji bo lidarxistina hilbijartinan.
3. Referandûma ji bo destûrê ji aliyê gel ve.
4. Birêvebirina hilbijartinên azad û dadperwerane, da ku xelk bikaribin nûnerên xwe yên parlemanê û serokê welat li gorî yasaya bingehîn a nû diyar bikin.
Herwiha di biryarê de hatiye ku dirêjiya dema hikûmeta veguhêz ji 18 mehan derbas nebe.
• Hevbendiya Niştimanî diyar dike ku li gor pîvanên navdewletî, çênabe Komîteya Dariştina Destûrê bi ser desthilata cîbicîkar ya ku hikûmet di destê wê de ye ve be, lê divê girêdayî Encûmena Damezrîner be, û pejirandin an redkirina destûrê di destê gelê Sûriyê de be di riya referandumeke giştî re.
• Hevbendiya Niştimanî diyar dike ku tedbîr hene ku pirsa qebûlkirina navdewletî ji hikûmeta veguhêz ya Sûriyê re hêsan û bilez dike, û rê dide rakirina sizayan ji ser wê û dana alîkariyên aborî û veberhênananê, û mijara hilanîna sizayan bi gavên veguhestina siyasî ya li gor biryara 2254 têkildar e.
• Ragihandina pabendbûna bi cîbicîkirina biryara 2254 ji aliyê Hêzên Şoreşa Sûriyê ve, civaka navdewletî dilniya dike derbarê arasteya dewleta Sûriyê û sîstema wê ya siyasî ya paşerojê, û piştrast dike ku ew dê ber bi tundrewiyê ve an dîktatoriyeke nû an dûrxistina çi pêkhate û mezhebên gelê Sûriyê ve neçe.
• Hevkariya hêzên leşkerî û siyasî yên niştimanî di vê qonaxê de pêwîst e, ji bo avakirina Sûriyeya nû li ser bingehên saxlem ku aramî, bextewarî û pêşketinê ji gelê Sûriyê re garantî bike û nehêle ku nifşên paşerojê têkevin ezmûnên mîna yên serdema stemkariya hilweşiyayî, û ev hevkarî di heman demê de nahêle qurbaniyên nû çêbibin ji encama paşguhkirina hin xalên ku bihêlin rijêmeke wek ya rûxayî peyda bibe.
Di vê çarçoveyê de, Hevbendiya Niştimanî tekezîyê li ser pêwîstiya peyketin û dadgehkirina hemû kesên ku tawanên cengê li dijî gelê Sûriyê pêk anîne dike.
Hevbendiya Niştimanî ya Hêzên Şoreşê û Rikberiya Sûrî
Ofîsa Ragihandin û Peywendiyan
16 kanûna pêşîn 2024
