Emîndarê giştî yê Hevbendiya Niştimanî ya Sûrî Heysem Rehma, hişyarî da der barê asankariyên ku rêjîma Esed ji milîsên Îranî û Libnanî re dabîn dike ji bo destdanîna ser malên kesên koçberkirî li Şam, Hums û Dêrezorê, piştî ku wan milîsan ji tirsa êrîşên Îsraîlê cihên xwe guhertine.
Rehma roja çarşemê got: “Rêjîma Esed hîn jî dest datîne ser mal û milkên bi sed hezaran Sûrî yên ku bi komkujî û şerê xwe yê ji 13 salan de berdewam e koçber kirine, û vê dawîyê jî tiştin metirsîdar pêk tên, ku dest tê danîn li ser xanî û mal û milkan ji bo bercewendiya milîsin biyanî.”
Her weha got: “Em dibînin ku tişta ku rêjîm, Îran û milîsên Hizbullah dikin, binpêkirineke nû û metirsîdar e li dijî Sûriyan, û gavek e di plana guhertina demografîk de, û em tekezîyê li ser pêwîstiya destwerdana welatên Ereb ên bira û civaka navdewletî dikin ji bo têkbirina van pilanan.”
Rehma tekez kir ku vegera penaberên Sûrî û dabînkirina jîngeheke ewle ji wan re, take rê ye ji bo garantîkirina mafên wan, piştî pêkanîna veguhestina siyasî li gorî biryarên Encûmena Ewlekariyê (2254 û 2118) û paqijkirina herêmê ji krîzên ku rêjîma Esed peyda kirine.
Rehma bal kişand ser wê yekê ku Îran, ji dema ku destwerdan ji bo bercewendiya rêjîma Esed kiriye, hewl dide nasnameya çandî li Sûriyê biguherîne û ramanên mezhebî yên ku tevna Sûriyê ji hev dixe belav bike, û ew jêdera sereke ye ji milîsên biyanî yên ku piştgiriya rêjîmê dikin û beşdarî komkujî û êrîşên wê yên li ser gelê Sûriyê kirine re.
Jêder: Ofîsa Ragihandinê ya Hevbendiya Niştimanî ya Sûrî
