Serokê Hevbendiya Niştimanî ya Sûrî Hadî El-Behra, bi amadebûna hevrêzkarê Desteya Pêwendiyên Derve ya Hevbendiya Niştimanî Ebdulehed Stêfo, civîneke ji dûr ve ligel berpirsê karûbarên Japonyayê û şanderê taybet bo Sûriyê Akihiro Tsuji pêk anî, û bi hev re pêşhatên dawî li herêmên vê dawiyê hatine rizgarkirin û xebatên ji bo parastina aştiya sivîl û dabînkirina ewlehî û selametiya welatiyan ji aliyê hikûmeta birêvebirina kar ve û kêşeyên li pêşiya Sûriyê di qonaxa veguhêz de û herweha mijara nûavakirina Sûriyê gotûbêj kirin.
El-Behra bal kişand ser wê yekê ku armanca sereke di dema niha de ew e, derbaskirina vê qonaxa veguhêz bi awayekî serkeftî ye û çesipandina ewlehî û aramiyê, dabînkirina xizmetguzariyên bingehîn û berdewamkirina rêşûnên hukumraniya veguhêz ji bo pêkanîna daxwazên gelê Sûriyê û bidestxistina dadwerî, azadî û demokrasîyê.
El-Behra behsa karê ku ji aliyê Hevbendiya Niştimanî ve hatiye kirin kir, çi bi rêya fraksîyonên leşkerî yên di nava Odeya Operasyonên Leşkerî û di bin serpereştiya wê de ne re be, ku îro erkên xwe di warê dabînkirina ewlehiyê û parastina dezgeh û saziyên dewletê de pêk tîne, û hebûna Endamên Hevbendiyê li hejmarek ji bajarên Sûriyê û beşdariya wan di civînên ligel pêkhate û aliyên Sûriyê ji bo bihêzkirina aştiya sivîl, herweha çend civînên dîplomatîk pêk anîne, ku ya dawî di çarçoveya civîna şanda Desteya Danûstandinan a Sûriyê de li gel Şanderê Neteweyên Yekbûyî ji bo Sûriyê Geir Pedersen bû, ku vê dawiyê li Şamê hatibû lidarxistin ji bo gotûbêjkirinê pêvajoya siyasî û nêrîna derbarê pêşerojê.
El-Behra rola erênî ya Japonê weke yek ji alîkarên sereke di Sindoqa Qerzdana Nûavakirinê de li Sûriyê bilind nirxand, û got: “Beşdariyên Japonyayê di piştgirî û fînansekirina pirojeyên çakbûna zû de li deverên li derveyî kontrola rêjîmê xwedan nirxeke mezin bû, bi taybetî di warê xizmetên tenduristiyê, çaksazkirina binesaziyê û bernameyên rêyên jiyanê, tevî bernameyên qerzên piçûk.”
El-Behra bal kişand ser wê yekê ku di rewşa nû ya Sûriyê de, berdewamiya piştevaniya Japonyayê ji sindoqa qerzdanê re giringtir bûye û tekez kir ku sindoqê pisporiyeke mezin di warê cîbicîkirina pirojeyên curbicur di hundirê Sûriyê de bi dest xistiye.
El-Behra tekezî li ser giringiya peywendiyên bi Japonyayê re kir ji ber ku ev yek bûye alîkar ji bo kêmkirina azarên Sûriyan di salên borî de û dê Japonya bibe hevparekî bazirganî yê bingehîn di paşeroja Sûriyê de, bi taybetî di warên teknolojî, pêşkeftina pîşesazî û sektora tenduristiyê de, û dê sûde ji ezmûna geşepêdana Japonyayê piştî karesatên Hîroşîma û Nagazakî û kêşeyên hevbeş û nûavakirinê were dîtin.
El-Behra tekez kir ku piştgiriya Japonyayê ji qonaxa veguhêz re li Sûriyê nîşana xurtiya peywendiyên di navbera welatên me de ye ji bo xizmeta daxwazên gelê Sûriyê.
El-Behra diyar kir ku Hevbendiya Niştimanî peywendiyan li gel hemû pêkhate û mezhebên gelê Sûriyê dike.
El-Behra her wiha tekez kir ku tişta giring îro piştgiriya hikûmeta birêvebirina kar ya li Şamê ye, ku dê heta adara bê ji sala 2025 kar bike, û got ku piştî wê dê hikûmeteke veguhêz a berfireh were avakirin û rola wê di dermankirina birînên xelkê de hebe û beşdariya tevaya gelê Sûriyê di avakirina paşeroja welat de garantî bike.
Ji aliyê xwe ve, nûnerê taybet ê Japonyayê tekez kir ku helwesta welatê wî derbarê pêwîstiya cîbicîkirina qonaxa veguhêz a siyasî li gorî biryara 2254 ya Encûmena Ewlekariyê, bi rêya proseyeke siyasî ya berfireh û cihê baweriyê ji bo dabînkirina aramî û bexteweriyê li Sûriyê zelal e.
Wî tekez kir ku Japonya pabend e bi piştgirîkirina destpêşxeriyên ku beşdarîyê di vê armancê de dikin, û da zanîn ku di 14 salên borî de, Japonyayê di serî de alîkariyên mirovî dabîn kirin û piştgirî da pirojeyên çakbûna zû bi rêya ajansên mîna Sindoqa Nûavakirina Sûriyê, heta di bin şert û mercên dijwar de jî.
Jêder: Ofîsa Ragihandinê ya Hevbendiya Niştimanî ya Sûrî
