Danûstendinên cinêv ji hêla Desteya Bilind ya rikberiyê hate rawestandin, ji ber ku rêjîm bi biryarên Netewên Yekbûyî ne pabend e , hûn çi paşrojê ji van danûstendinan re dibînin?
piştî ku hemû aliyên şerê çekdarî li Sûriyê ji serkeftina leşkerî bêhêvî bûn, ew bo çareseriya siyasî gihiştin hev, ango hemû alî çareseriya siyasî dipejirînin, lê ew li ser şêweyê çareseriyê nakok in, Rêjîm çareseriyê li gor xwe dibîne ku divê desthilat di dest wê de be, û çareserî li gor Rikberiyê bidestxistina desthilatê û çûna Rêjîmê ye.
Bêguman civaka navdewletî Rêjîma Sûrî xweş nas dike, û dizane ku Rêjîm di riya guftûgoyan re ti desthilatan radestî Rikberiyê nake, ango ev danûstandin ne cidî ne ji destpêka Cinêv1 û Viyêna û ta bi Kongirê Riyadê û ta niha tiştekî rastî tune ye, belgeya serekî di Cinêv1 de ya ku danûstandin li ser hatin avakirin, bi nerîneke bigiştî hat, û çarenivîsa serokê Rêjîmê diyar nekir, ango ti paşeroj ji van danûstandinan re tune ye, çareseriya siyasî ya birastî wê pêk bê dema ku civaka navdewletî û aliyên herêmî pabendiyê bi pirensîpên Netewên Yekbûyî û biryarên civaka navdewletî derbarî Sûriyê bikin
Agirbest li Helbê bi dawî hat û şer û pevçûn ji nû ve vegeriyan, rewşa Sûrî di warê leşkerî de bi ku ve diçe ?
piştî bidawîbûna agirbesta ku li Helebê çêbû, rewşa leşkerî li Sûriyê bi alî xerabûnê ve diçe, û tenê miletê Sûrî bi hemû pêkhateyên xwe baca vê rewşa aloz û metirsîdar dide, û hejmara qurbaniyan pir bilind dibe, dorpêçkirina abûrî wê li Sûriyê zêdetir bibe, û divê civaka navdewletî mîkanîzmekê deyne bo gihandina pêdeviyên jiyanê ji hemû welatiyan re li navçeyên Sûrî yên dorpêçkirî , ku xelkên wan deveran bi dijwarî pêdeviyên jiyanê dabîn dikin.
Gef û fişarên partiya Yekîtiya Demuqrat PYD li ser Encumana Niştimanî ya Kurd li Sûriyê ENKS zêde dibin, çi bersiv li cem ENKS hember van kiryaran heye?
Bi rastî PYD’ê fişar û kiryarên xwe li dijî ENKS’ê û partiyên wê zêde dike , herwiha gefan li serkirdeyên ENKS ê dikin û hin ji wan binçav kirin û hin ji welat dûr xistin, li gel şewitandina nivîsgehan û girtina wan û êrîşkirina li ser malên çalakvanan û sepandina bacan li ser milet, û girtina ciwanan bi behaneya leşkeriya naçar …, lerwa ENKS ê bi hemû şiyanên xwe li hember van fişar û kiryaran derdikeve, û di civîna dawî de biryar hat standin ku ENKS ê wê bi hemû çalakiyên yasayî û siyasî rabe li dijî van kiryar û fişaran, ev kiryarên wiha li dijî miletê kurd bigiştî ne, û tenê dijminên miletê kurd sûdê ji van kiryarên hovane werdigirin.
Piştî girtina dergehê Sêmalka, fişarên ji hêla PYD ve di warê abûrî de li ser deverê zêde dibin, û di encamê de rewşa jiyanê li devera Kurdî zehmet dibe, ENKS di vî warî de kare çi ji milet re bike?
Diyar e ku ENKS’ê ne di wê asta abûrî de ye ku karibe pêdeviyên jiyanê ji welatiyan re dabîn bike, lê ew xwedî şiyanên siyasî ye dikare van siyasetên PYD û kiryarên wê ji raya giştî re eşkere bike, herwiha emê bangê li civaka navdewletî bikin da ku alîkariyan bo herêmên kurdî bişînin wek herêmên Sûrî yên dorpêçkirî ji aliyê Rêjîma Sûrî ve.
