Artêşa Azad li ser eniyên başûr di herdu parêzgehên Der’a û Quneytira de kariye bi yekcarî rêxistina DAIŞê têk bişkîne, piştî peydabûna hin şanikên wê bi şêweyekî nehînî û sînordar di vê dema dawiyê de li herdu parêzgehan, hevdem ligel serkeftinên mezin yên ku şoreşgeran li ser hêzên Esed li bakurê Sûriyê bidest xistin, û rizgarkirina heryek ji bajarê Idlib û Cisr Elşixûr û serbazgeha Elqermîd.
Berdevkê Fermî yê Hevbendiya Niştimanî Salim Elmislit dupat kir û got ku tenê artêşa Azad dikare rêxistinên terorîst jinav bibe û wan têk bişkîne, ewjî bi saye hevgirtin û yekirina tabûr û hêzên xwe û karkirina ji bo pêkanîna serkirdayetiyek yekgirtî, tevlî nebûna piştgiriyek rasteqîne jê re û êrîşên duqolî yên berdewam ji aliyê heryek ji rêjîma Esed û rêxistina DAIŞê ve, û divê neyê jibîrkirin ew staratîjiya rêjîmê ya peydakirina parastinek asîmanî ya berdewam ji bêhtirî salekê ve ji DAIŞê re.
Elmislit diyar kir ku ev serkeftin ketwarekî Siyasî nû ye ,û xwe li ser hemû bereyan disepîne, pêwîste li berçav bête girtin û li ber ronahiya wê çareseriyek dumahiyê bête danîn, ku têde daxwazên gelê Sûriyê dabîn bibin, û dawiyê li vî werzê xwînewî ji dîroka Sûriyê bîne.
Herwiha Elmislit amaje bi wê yekê kir ku pêwîst e hewl û bizav bên terxankirin ji bona rêxweşkirin û amadekariyan bo veguhestinek siyasî giştgîr ku dawiyê li zîncîra mirinê ya li ser destê rêjîma Esed tête pêkanîn bîne, herwiha dergeh li pêş jinûavakirin û veguhestina Sûriyê berû dewleteka Sivîl vebin, ku têde xwestekên hemû pêkaheteyên gel dabîn bibin.
Dîsa Elmislit baweriya xwe bi hêzên şoreşê nû kir, yên bervaniyê di ber Sivîlan de dikin û pabendiyê bi rewişt û piransîpên şoreşê dikin û rêzê li peyman û belgenameyên navdewletî digirin û got: ” em ji aliyê xwe ve tekeziyê li ser helwestên xwe yê negor û herwiha pabendbûna xwe bi piransîpên şoreşê heta rûxandina rêjîma Esed dikin “.
Jêder: Hevbendî
