Hevbendiya Niştimanî Ya Hêzên Şoreşê Û Hevrikiya Sûriyê hişyarî da ji bo bobelata mirovî ya ko bi birçîbûn û sermayê gefê li jiyana kesên dorpêçkirî dike. Çimkî Hêzên Esed û Milîtanên Hizbullaha tirorist bajarên Medaya û Beqîn li Gundewarê Şamê yê Rojava ji çend mehan ve dorpêç kirine, û rê li ber derbasbûna keresteyên bingehîn yên xwarinê yên giring ji jiyana 40 hezar sivîlî re girtine.
Komîta yasayî ya Hevbendiya Niştimanî di daxuyaniya xwe ya ko Îro belav kir, ji Komkara Erebî û Netewên Yekbûyî û Şandyarê Navnetewî yê taybet bi Sûriyê doz kiriye, da bi berpirsiyariyên xwe rabin ji bo ew kesên sivîl ko ji hêla Çeteyên Rêjîma Esed û Milîtanên Hizbullaha tirorist ve li Medaya û Herêmên din hatine dorpêçkirin, da yekser tevbigerin û sivîlên bêguneh biparêzin û bihêlin yekser karwanên alîkariyên mirovî û yên bijîşkî derbas bibin. Her weha cîbicîkirina biryara Encûmena Ewlekariyê ya hejmar 2139 ya di benda wê ya şeşan de dibêje “hêlana yekser ji dezgehên mirovî re yên bi ser Netewên Yekbûyî ve û hevparên wê yên cîbicîkirinê ko alîkariyên mirovî bilez û hêmin û bê astengî derbas bikin, ji nav wan jî yên ko di herêmên nakokiyê û sînor re derbas bibin ji bo dabînkirina gihandina alîkariyên mirovî ji bo ew kesên hewcedar.”
Her wiha birayara 2254 ya sala 2015an derçûye ya ko têde“doz li Rêjîmê bûye da rê li ber hemû êrîşên li ser sivîlan bigire û dorpêçê rake û derfetê bide alîkariyên mirovî bo derbas bibin û bombebarana li ser sivîlan birawestîne.”
Komîta yasayî ya Hevbendiyê doz li hemû Rêkxistinên Navdewletî kir ko tevgerê bikin ji bo fişarê bidin ser Civaka Navdewletî û gerek Desthilatên wan tevgerê bikin da jiyana kesên bêguneh li Medaya bi taybetî û Bajarên din ên Sûriyê yên dorpêçkirî bi giştî rizgar bikin.
Hejmara sivîlan yên dorpêçkirî li Sûriyê dora nîv milyonî heye, hemû ji birçîna li ber mirinê ne, ev bi xwe jî tawankariyeke cengê ye, û rêkxistinên navdewletî ew jî berpirs in çimkî bi tawankariya bêdengiyê beşdar bûne.
Daxuyaniyê nameya xelkên Medaya jî belav kir ya ko ewan bi xwe ji cîhana azad re şandiye:” bi sedema birçîbûnê laşê me nema dikare ser piyan biraweste da em karibin gora xwe bikolin, xelkê ji me re bişînin da gora me û zarokên me bikolin, ji sermayê û birçîna em li benda mirinê ne. ”
Jêder: Hevbendî
