Hevbendiya Niştimanî ya Sûrî hevkariya xwe li gel miletê Îranê anî ziman, ew milêtê ku li hember rijêma meleyan serî hildaye, nemaze li gel jinên Îranê yên ku careke dî rûyê rasteqîn yê rijêma stemkar ya di pêkanîna tawanan dijî gelê xwe û gelên deverê de berdewam e eşkere dike.
Û Endamê Desteya Siyasî Ebdellah Gedo got ku gelê Sûriyê yê bi hesreta azadiyê û hêzên wî yên siyasî û di pêşî de Hevbendiya Niştimanî, hevkariya xwe ya tam li gel daxwazên rewa yên gelên Îranê, bi curbecur pêkhatên wî yên netewî û olî û çandî yên serî hildane, tîne ziman.
Û Gedo tekez kir ku jinên Îranê di xwepêşandanên xwe yên li dijî kuştina jina ciwan Mahsa Emînî de qehremaniya xwe diyar kirin, û cextî li ser piştevaniya daxwazên wan ên rewa yên wekhevî û demokrasiyê û redkirina serpereştiya rijêmê ji wan re kir.
Tê zanîn ku di Hefteya derbasbûyî de, dezgehên ewlekariyê yên rijêma Îranê, xwendekara Kurd a Îranî ya bi navê Mahsa Emînî yaku li gel birayê xwe bû dan ber lêdaneke tund, bi behaneya binpêkirina yasayên poşîna cil û bergên ku rijêma Îranî disepîne, ew jî bû sedem ku keça 22 salî jiyana xwe ji dest bide.
Û ji dema ku mirina wê hatiye ragihandin ve, xwepêşandanên şermezarkirinê li bajarên Îranê dijî wê tawanê derdikevin, û vîdyoyên tomarkirî nîşan didin ku xwepêşanderan dengên xwe bi diruşmên “Bimre dîktator – azadî – dadperwerî” bilind dikin, lê hêzên ewlekariyê yên Îranê gule berdan xwepêşenderan, di encamê de hejmarek ji welatiyan hatin kuştin û hejmarek jî birîndar bûn.
Û Gedo got ku rijêma stemkar ya Îranê rastiya xwe ya mezhebî û nijadperest eşkere dike, ji bo azadiyên takekesî li Îranê nehêle, piştî yekalîkirina desthilatê û dûrxistina mezheb û olên din, her weha bêparkirina neteweyên ne Faris ji mafên wan ên netewî di Îranê de, nemaze mafê xelkê herêmên Kurdistan, Erebistan, Bilûçistan, Azerbaycan û pêkhateyên din ên netewî û olî, yên li seranserî erdnîgariya Îranê hatine çewsandin.
Û got ku rijêma stemkar ya Îranê ne tenê azadî serkut kir û bihezaran ji xebatkarên Îranî yên ku li dijî desthilata wê ya siyoqratî rabûne xistin zindanan de, lêbelê hîn milîsên xwe yên mezhebî û çekdaran li derveyî Îranê belav dike, wek Iraq, Sûriya, Libnan, Yemen û deverên dîtir, daku îdyolojiya xwe ya mezhebî û nijadperestiyê belav bike.
Û Gedo sersaxî ji bo malbata şehîda jin Mahsa Emînî û hemû malbatên şehîdên Îranê re xwest, û tekez kir ku çarenivîsa rijêma melayan dê mîna çarenivîsa rijêma Esed û rijêmên diktator ên stemkar be, û got ku herdû gelên Sûriya û Îranê dê azadî û rûmeta ku her tim ji bo wê têdikoşin û qurbaniyên buha pêşkêş dikin bi dest xwe ve bînin.
Jêder: Ofîsa Ragihandinê ya Hevbendiya Niştimanî ya Sûrî
