Berpirsiyarekî Hevbendiya Niştimanî ya Hêzên Şoreşê û Rikberiya Sûriyê daxwaz ji Rûsya kir ku wekû aliyekî dabînker ji peymana agirbestê re tevbigere, û bi bendên peymanê pabend be, û dev ji siyaseta nixumandina tawankariyên rêjîmê û milîtanên digel wî şer dikin berde.
Endamê desteya siyasî ya Hevbendiya Niştimanî Yasir Elferhan di daxuyaniyeke taybet de îro got: “Mosko hêj tawankariyên rêjîmê dinuxumîne û wekû aliyekî dabînker pabendiyê bi peymanê nake”. Daxwaz kir ko peyman bête vejandin û rê li ber binpêkirinên rêjîmê û milîtanên Îranî bigire.
Elferhan got ku giring e Mosko nebe asteng li pêşberî sizakirina rêjîmê piştî bikaranîna wê ji çekên kîmawî re li dijî sivîlên Xan Şêxûn, û tekez kir ko rêka bi tenê bo kartêkerina operasiyona siyasî û peydakirina çareserkirineke siyasî ew e ko çareyekê ji bo rawestandina şer li hemû derên welat bibînin.
Her weha Elferhan daxwaz kir ko hemû girtî li gora biryarên navdewletî û bi taybetî biryara 2254 bêne berdan, û destnîşan kir ko rêjîm hewil dide mijara pevguhertina hêsîran bikar bîne ji bo bi biryarên navdewletî bilîze.
Elferhan destnîşan kir ko Rûsya ya ko wek aliyekî dabînker peyman imze kiriye, berpirsiyarên yasayî û sizayî û yên sivîlî hildigire, û bêtir got ku devjêberdana wê ji vê rolê dê bihêle ew ji hemû miletê Sûrî wekû aliyê dabînker neyête pejirandin.
Jêder: Nivîsgeha Ragihandinê ya Hevbendiya Niştimanî
