Ofîsa Têkiliyên Derve ya Hevbendiya Niştimanî ya hêzên şoreş û rikberiya Sûriyê, bi amadebûna Serokê Hevbendiyê Enes Abda, îro roja înê, civîna xwe ya roldemî bi şand û nûnerên welatên dostê gelê Sûrî re lidar xist, û bi hev re dawîtirîn pêşhatên meydanî û siyasî yên têkildarî dosya Sûrî, nemaze rewşa mirovahî a dijwar li Idlibê, û dîtina hikûmeta demkî ya sûrî, digel pêvajoya makezagonê gotûbêj kirin.
Endamên Hevbendiya Niştimanî pêdaçûnek bi berfirehî li ser tawanên şer yên ji aliyê rejîma Esed û hevalbendên wê ve li deverên kêmkirina zêdegaviyan li bakurê Sûrîyê, û qeyrana mirovahî ya ku bû sedema koçberkirina nêzî milyon û nîvek kes ber bi deverên sînorê Tirkîyê de pêşkêş kirin.
Serokê Hevbendiya Niştimanî Enes Abda, tekez kir ku civaka navdewletî nikariye bi erkên xwe rabe jibo parastina sivîlên li Sûriyê, û gazî nûnerên hikûmetan kir ji bo oparesyonên leşkerî bi carekê rawestînin, û vegerin pabendbûna bi peymana Idlibê, û piştevaniya mana xalên çavdêriya Tirkiyê.
Wî tekezî li ser pêdiviya rabûna hemû welatan bi berpirsiyariyên xwe û rastkirina şaşîtiyên xwe kir, û daxwaza destpêkirina bangewaziyek navdewletî ji bo piştgiriya mirovahî ya lezgîn ji koçberan re kir, û hişyarî da derbarê peydabûna pêlên nû yên penaberiyê.
Abda daxwaza piştgiriya hebûna saziyên medenî yên Hevbendiya Niştimanî li hemû deverên rizgarkirî kir, nemaze li ldlibê, tevî pêşkêşkirina xizmetgozariyên baştir ji bo niştecîhan.
Ji aliyê xwe ve, serokwezîrê hikûmeta demkî ya Sûrî Abdul Rehman Mistefa pilana nû ya hukûmetê pêşkêş kir, û bal kişand ser hewcedariya piştgiriya bilez bo wê pilanê da bibe bernameyên rastîn yên karên di berjewendiya sivîlên deverên rizgarbûyî de, û diyar kir ku ev dê bandorek erênî ya mezin li vegera koçberan bike.
Herweha Mistefa behsa riyên hevkariya bi Hevalbendên Sûrî re kir, ji bo serxistina karnameya hikûmeta demkî ya Sûrî, û ew bi armancek hevbeş di navbera Sûrî û hemû welatên dost û piştevanên şoreşa Sûrî de dît.
Cîgirê Serokê Hevbendiya Niştimanî Ebdulhekîm Beşar derbarê rewşa devera bakurê-rojhilat axivî, û projeya Hevbendiya Niştimanî derbarê rêvebirina vê herêmê pêşkêş kir.
Serokê desteya danûstendinan ya Sûrî, Dr. Nesr Al-Harîrî, pêşhatên pêvajoya siyasî û nûçeyên derbarê destpêkirina karê komîteya destûrî pêşkêş kirin, û tekezî li ser destpêkirina proseya siyasî û bicîhkirina biryarên navdewletî kir, nemaze daxuyaniya Cinêvê û biryara 2254, û hişyarî da li ser bicîhnekirina bendên mirovahî yên di tekstên biryarên navnetewî de.
Jêder: Ofîsa Ragihandina Hevbendiya Niştimanî Sûrî
