Berevaniya Sivîl ya Sûriyê ragihand ko hêzên Esed kuştarek sibeha îro pêkanîne, di encamê de 45 sivîl bûne qurbanî, ji wan malbatên derbider li taxa Cib Elqibê li Heleba dorpêçkirî bi sedema topbaranê.
Cîgirê Serokê Hevbendiya Niştimanî ya Sûrî Ebdilehed Istêfo, ji serokê Emerîka Barak Obama daxwaz kir ko têwerdanê bike da kuştarên rêjîma Esed û Rûsya di derheqê sivîlan de rawestîne. Istêfo diyar kir “tev ko Obama di dûmahiya wilayeta xwe de ye jî, lê em bi karîna wî bawer in wek serokê mezintirîn dewleta cîhanê, eger viyan hebe dikare kuştaran rawestîne.”
Istêfo tekez kir ko tiştê doh û vê sibehê bû, bi kuştina 70 sivîlan ji malbatên ji agirê Esed û Rûsya ji taxên rojhilat reviyayî, dihêle ko dewletên mezin û bi taybetî hevalên Sûriyê wek Emerîka, Birîtanya û Firensa li dijî wan rabin û vê dijminkariya hovane li ser miletê Sûriyê rawestînin.
Istêfo bêtir got: Tevgera hevalan bûye giringiyek, eger ji derveyî Encûmena Ewlekariyê be jî, ji ber ko Encumana Ewlekariyê rola xwe ji dest daye bi sedema Rûsya ya ko mafê wê yê Vîtoyê heye û aliyek e li kêleka rêjîma Esed, û şirîka xwînrijandina miletê Sûrî ye.
Cîgirê serokê Hevbendiyê got ku Rûsya û rêjîma Esed tu bijarede ji xelkê re nehiştine, eger li taxên dorpêçkirî bimînin bi firokên Rûsî têne bombebarankirin, û eger derkevin bi topên Esed têne topbarankirin, û ji ber vê yekê gerek hevalên gelê Sûrî tevbigerin û rijandina xwîna miletê bêguneh rawestînin.
Jêder: Nivîsgeha Ragihandinê ya Hevbendiya Niştimanî
