Daxwiyaniyeke Rojnamevanî
Hevbendiya Niştimanî di riya Desteya xwe ya Siyasî re bi awayekî berdewam pêşketinên li Deraa çêdibin dişopîne, û pêwendî li gel nûnerên xelkê me li wir berdewam in, û hemî karînên Hevbendiyê tev komîte û ofîsên wê di xizmeta Deraa û xelk û nûnerên wê de ne, û em piştgiriya xwe ji wan re tekez dikin, û rewşa wan li ber çav digirin.
Divê lihevkirin û pilanên ku bi kotekî û terorê têne sepandin, tenê wek tawanên dijî mirovahiyê yên ku gelê me rastê wan tê bên dîtin, nemaze ku ew rêkeftin di bin fişareke mezin de li ser perçeyeke erda biçûk a ji aliyê sê artêşan ve hatiye dorpêçkirin pêk tê.
Pir ron û zelal e ku çi lihevkirina ku îro hêzên dagîrker yên Rûsî û Îranî têde beşdar in, ti nirx û duristiya wan tune ye, û ew lihevkirin hewcedarî garantiyên navdewletî yên cidî ne, ji bo ku aştiya sivîlan dabîn bike, û helwesteke vebir bistîne, daku kêmtirîn astên debara jiyanê dabîn bibe, û rûmeta xelkê me li Deraa biparêze.
Divê dewletên xwedî-bandor û dewletên bira bi awayekî cidî û lezgîn bilivin, daku tawanê rawestînin, û çembera dorpêçkirinê ji ser xelkê me di zûtirîn dem de vekin, û alîkariyên mirovahî û bijîşkî bê derengî derbas bikin, ji ber ku piştguhkirina berpisyariyê derbarê parastina sivîlan li Deraa dê encamên wê xirab bin.
Îro metirsiya Îranî yaku me hişyarî jê daye û ji bandorên wê û berfirehbûna wê ya wek penceşîrê pir caran daye xuyakirin. Bûye ketwarek li hember çavê her kesî, û vaye milîsên Îranî li ser tixûbê dewleteke erebî ya nû ne, û em hêvîdar in ku bihayê vê yekê ne giran be, û dewletên erebî tevgerê bikin, û metirsiyê nas bikin berî ku hîn bêhtir ziyan çêdibin, û berî ku ziyanin dî yên veger jê tune be pêk bên.
Desteya Siyasî di avakirina helmeteke navdewletî û birêkirina hejmarek ji nameyên diplomatîk û yadnameyên yasayî bo Wezaretên Derve û saziyên navdewletî, derbarê binpêkirinên ku rijêma Esed û piştgirên wê dijî xelkê bajêr pêk tîne berdewam e, û Hevrêzî û xebatên piştgiriyê ji bo pêdariya xelkê Horanê dijî êrîşên rijêmê û alîgirên wê didome, her weha hevrêziya li gel Netewên Yekbûyî û dewletên xwedan-bandor û saziyên mirovahî û mafnasî.
Em careka dî piştgiriya xelkê me yê dorpêçkirî tekez dikin, û em pesna pêdarî û mana wan li ser xakê didin, û ji şoreşgerên Sûriyê û peyayên wê, nemaze peyayên Horanê li hemû bajar û gundan tê xwestin ku bi gelemperî piştgir bin, daku pirojeya Îranê ya kirêt têk biçe, û rêbaza rijêma tawanbar yaku li ser bingeha koçberkirin û qirkirinê ava bûye bişke.
Deraa dê bimîne landika şoreşa Sûriyê û striyê di gewriya zordar û stemkar û dagîrkeran de, û mirovê Sûrî yê pişta xwe bi mafê xwe û hezkirina azadî û rûmet û dadweriyê girêdaye, dê bimîne têkoşerê li ser riya şoreşê bi hemû alavên berdest ta ku daxwazên xwe pêk bîne, û azadiya xwe vegerîne.
Hêza gelê Sûrî û rijdiya wî li ser azadî û rûmetê, dikare hejmarek mezin ji bijardeyên nû biafirîne, ew derfetên ku dihêlin berdewamiyê di şoreşa xwe de bikin, û daxwazên xwe yên mafdar misoger bikin.
Hevbendiya Niştimanî ya Hêzên Şoreş û Rikberiya Sûrî
Ofisa Karûbarên Penaberan
6 Rezber 2021
