Daxuyaniyeke Rojnamevanî
Bi helkefta sêzdemîn salvegera şoreşa Sûriyê ya gewre, Hevbendiya Niştimanî ya Sûrî rêz û silavan arasteyî gelê me yê xweragir ê ku li dijî rêjîma Esed têdikoşe dike, û xebat û viyana Sûriyan di şert û mercên dijwar de li hemû herêmên Sûriyê bilind dinirxîne, Sûriyên şoreşger ên ku peykerê stemkarî, zordarî û bêdadiyê hilweşandin, û demgê xwe ji bo azadiyê bi awayekî aştiyane di xwepêşandanan de bilind kirin û qurbanî dan.
Di vê helkeftê de, Hevbendiya Niştimanî qurbanî û şehîdan bi bîr tîne, ew fedakarên ku canê xwe ji bo azadî û rûmetê dan, piştî ku rêjîma Esed li dijî xwenîşandanên aştiyane derket û bersiva çiqilên zeytûnê bi guleyan, girtin û işkenceyê da, û dagirker û milîsên mezhebî anîn, û bombebarana bi bermîlên teqîner, madeyên kîmyayî û çekên cuda yên qedexekirî li ser asta navdewletî bikar anîn, û wê û piştgirên xwe sûde ji danûstandina civaka navdewletî ya sist bi biryarên 2118 (2013) û 2254(2015) û nebûna dadgehkirin û darizandinê wergirtin.
Îro ji civaka navdewletî zêdetir tê xwestin ku bi awayekî cidî û guhdaneke bêhtir bi daxwazên gelê Sûriyê yên ku ji bo bidestxistina wan serî hildaye re bide û bistîne, û bi awayekî rasteqîn û kartêker bixebite ji bo pêkanîna çareseriyeke siyasî li gorî biryarên navdewletî, û dewleta demokratîk a ku tê de nirxên azadî, dadwerî, wekhevî û serweriya yasa serdest bin ava bike, nemaze piştî ku rêjîma Esed bi dehan qeyran li ser asta xwecihî, herêmî û navdewletî peyda kirin, û bû sedema sereke ya mezintirîn kirîza mirovî ji Sûrîyan re, û tawanên şer û yên dijî mirovahîyê pêk anîn, û bêtir ji nîvê gelê Sûrîyê koçber kirin.
Hevbendiya Niştimanî tekez dike ku cîbicîkirina çareseriya siyasî li gorî biryarên navdewletî yên navborî, take çareserîya berdewam e, û tekane rê ye ji bo vegerandina rola Sûriyê ya bibandor li ser asta herêmî û navdewletî, ku dibe alîkar ji bo parastina asayîşa navçeyî û navdewletî.
Sûrîyan salvegera şoreşê kirine helkefteke niştimanî, tê de daxwazên xwe yên rewa ji bo ruxandina rêjîma Esed û avakirina Sûriya di dilê wan de nû dikin. Ev salveger tê da ku biryara me nû bike, îradeya me xurtir bike, û berdewamiyê bide şoreşa azadî û rûmetê û rijdiya li ser parastina piransîpên şoreşê, da em bi xwîna pak a şehîdên gelê Sûriyê re wefadar bimînin, ev bîranîn pabendbûna me bi serdemeke nû û Sûriyayeke nûjen nû dike.
Ji şehîdan re rehmet, ji girtiyan re azadî.
Û vegereke rûmetdar ji derbider û penaberan re.
Silav ji gelê Sûriyê yê têkoşer re.
Bijî Sûriya azad û serbixwe.
Azadî ji gelê me yê gewre re.
Hevbendiya Niştimanî ya Hêzên Şoreşê û Rikberiya Sûrî
Ofîsa Ragihandin û Peywendiyan
16 adar 2024
