Rêxistina Sipark ya Holendî, û bi hemahengiya li gel nûnerayetiya ENKS’ê Şaxê Yekîtiya Xwendekar û Ciwanan, wê alîkariya xwendekarên kurdên Sûriyê bike, yên li Herêmê dijîn û dixwazin xwendina zanîngehê berdewam bikin ta bidawîkieina xwendinê, bi rêka pêşkêşkirina alîkariya darayî wek alîkariyekê bo xwendekarên kurdên Sûriyê.
Û ji aliyê Rêxistinê û Yekîtiya Xwendekaran hejmarek simînar li kampên herêma kurdistanê hatin dan, ji bo şirovekirina mîkanîzma tomarkirin û pesendkirina xwendekaran, û rêkarên dabînkirina hemû pêdawîstiyan ji kesên bên pesendkirin re.
Ehmed Mihemed Emîn, berpirsê Yekîtiya xwendekar û Ciwanên Rojava, ji malpera me re got ku xwendekar dikarin navê xwe li sercem navend û xwecihiyên yekîtiyê li bajaran û kampên penaberan tomar bikin, û ev yek ji mafê her xwendekarî ye, û diyar kir ku wê form bêne komkirin û wê ji bona rêxistina Sipark bêne pêşkêşkirin, ji bona bêne pêşkêşkirin ji komîteya erêkirinê re, da xwendekar ligor piwanên wan û şiyana zanîngehên Herêmê bêne bijartin.
Emîn balkişand ku wê heyvane 280 dolar ji bona her qutabiyekî bê pêşkêşkirin ji bona dabînkirina behayê hatûçûnê û mesrefa xwendinê, û Rêxistin wê xwe bide ber timamkirina xwendina her qutabiyekî heta xwendina xwe bidawî bike.
Hêjayê gotinê ye ku Rêxistina Sipark ya Holendî û bi hemahengiya nûnerayetiya ENKS’ê Şaxê Yekîtiya Xwendekar Û Ciwanan, 261 behreyên xwendinê ji xwendekarên kurdên Sûriyê re, di sala 2015-2016 ya bûrî de pêşkêş kirin, û îsal jî wê hewl bide behreyan zêdetir bike.
Jêder: Hevbendî