Duhî roja sêşemê 6’ê çilê pêşî 2016 an, şandek ji nûnertiya Ewropa ya ENKSê bi serokatiya serokê wê endezyar Rêzan Şêxmûs û berêz Kejal Derwêş endamê nivîsîngeha pêwendiyên nûnertiyê, ligel wezareta derve ya Almaniya civiyan.
Di hevdîtinê de gelek mijarên giring yên taybet bi rewşa Sûriyê hatin gengeşekirin, nemaze rewşa Helebê û şerê hovane yê li ser dibe, ji aliyê rijêma Esed û hevalvendên wê ji Rûsiya û Îraniyan û milîsên mezhebperist yên şî’e, hevdem ligel kirîza mirovî ya xirab li bajêr û giringiya dîtina çareseriyek siyasî ji pirsgirêka Sûriyê re di çarçoveyê avakirina dewleteka federal, ku têde dad û azadî û aştî û demokrasî bo hemû pêkhateyên gelê Sûriyê misoger bibe, û hemû mafên netewî yên rewa bo gelê Kurd ligor belgename û rêkeftinên navdewletî misoger bibin.
Herwiha mijara opozisyona Sûriyê ya ku Hevbendiya Niştimanî ya hêzên şoreş û rikberiya Sûriyê nûnertiya wê dike, û giringiya mana ENKSê di hindur çarçova Hevbendiyê de, tevî gelek têbînî û rexne li ser helwesta wê ji doza kurdî li Sûriyê hene, hatin gengeşe kirin, û herwiha tekezî hat kirin li ser giringiya lidarxistina civînên doqolî yên diyalogê di navbera herdu aliyan de bi armanca dîtineka siyasî ya di berjewendiya hemû pêkhateyên gelê Sûriyê de.
Li aliyek din behsa siyasetên xirab yên PYDê hat kirin, ji kiryarên wê yên bi revandin û serkutkirkna serkirde û kadiroyên ENKSê û siyasetmedar û medeyakaran ku heta niha jî çarenivîsa hin ji wan ne xuya ye, herwiha behsa revandina ciwanên kurdan ya bi behaneya leşkeriya neçarî û şandina wan bo çeperên ku ti bercewendiya gelê Kurd têde tune ye, û herwiha êrîşên wê li ser xwepêşandanan û şewtandina baregehên ENKSê û patiyên wê, heta giha derbaskirina hêlên Sor û şewtandina ala kurdistanê, sembola pîroz ya miletê kurd, û bandora vê kiryara xirab li ser civaka kurdî û peydabûna nerazîbûnek mezin ku ev siyaset hemû dibin fakterên zêdebûna koçberkirina neçarî û reva ciwanan û kuştina wan li ser sînorên Tirkiyê.
Herwiha di hevdîtinê de bal hat kişandin li ser giringiya vegera pêşmergeyên “Roj” bo xaka welatê xwe, ji bo bergirîkirina gelê Kurd û doza wî ya netewî ya rewa, ku pêşmerge bi xwe bitenê dibin garantî bo peydakirina seqamgeriyek rasteqîn li ser zemînê ji bo rê li koçberiyê bête girtin û vegera bi sedhezarên ciwanên Kurd bo xaka welêt.
Wezareta derve ya Almaniya ji aliyê xwe piştgiriya xwe ji bo ENKSê di hemû biyavan de tekez kir, û herwiha amadebûna xwe nîşan da li hember pêşkêşkirina hemû bizavên pêwîst bo vê yekê.
Jêder: Hevbendî
