Tora Sûrî ya Mafên Mirovan tekez kir ku herî kêm 1614 kesên bi darê zorê hatine windakirin ji aliyê rijêma Esed ve, wek mirî di Dezgehên Tomarkirina Sivîlan de hatine tomarkirin, û hîn 96,000 kesên windakirî hene, û cext kir ku rijêm hîn jî bi awayekî hovane danûstandinê bi kêşa windakirîyan re dike.
Û di raporeke xwe de, ya bi sernavê “Rijêm herdu birayên çalakvan ên navdar Mu’az û Qusey Burhan, yên ku bi kotekî di navendên wê de hatibûn windakirin, wek mirî di dezgehên tomarkirina sivîlan de tomar dike” de, Tora Sûrî ya Mafên Mirovan diyar kir ku rijêmê herî kêm 1614 windakiriyên kotekî di dezgehên tomarkirina sivîlan de tomar kirine, û hîn 96 hezar kesên windakirî hene.
Û Raporê cext kir ku rijêm ji sala 2018an ve, bi awayekî hovane serederiyê li gel mijara windakirina kotekî dike, û got ku ew ne tenê nêzîkî 96,000 welatiyên Sûrî yên ku hin ji wan bi salan winda bûne vedişêre, lêbelê ji sala 2018an ve wan weke mirî di tomergeha sivîlan de tomar dike, û bêhtirê caran malbatên wan agahdar nake.
Û rapora Torê diyar kir, ku wê di 9ê çirya paşîn ya niha de, belgeyek bi dest xistiye, têde mirina herdu birayên çalakvan “Qusey û Mu’az Burhan” di rêya Dezgeha Tomarkirina Sivîlan a gundewarê Şamê re, û daneyên ku di belgeyê de nîşan dide ku “Qusey” di 31/1/2014an de miriye û Mu’az jî di 16ê Sibata 2014an de miriye, bêyî ku tu hûrgiliyên din hebin, wek rewşa bêhtirê daneyên mirinê yên ku bidest xistine û di tomargehên xwe de parastine.
Û Hevbendiya Niştimanî ya Sûrî tekez kiribû ku rijêma Esed li ser siyasetên xwe yên revandin û windakirina kotekî wek beşekî ji rêbaza cenga xwe li dijî gelê Sûriyê berdewam e, bi armanca jinavbirina serkêşên çalakvanan, û xistina tirsê di dilê gelê Sûriyê de, da vîna gel bişkîne, û rê li ber rêça azadî, dadwerî û rûmetê bigire.
Û Hevbendiya Niştimanî ji Encûmena Ewlekariyê ya Navdewletî xwest ku biryarên xwe yên pêwendîdar cîbicî bike, û cextî li ser cîbicîkirina ragihandina cîhanî ya ji bo parastina kesan ji windakirina kotekî kir, û rewşên windakirinê û çarenivîsa kesê winda diyar bike, û rêşûnên guncav ji bo lêgerîna kesên winda û diyarkirina cihê wan û berdana wan bistîne, û ger mirî bin divê cihê termên wan eşkere bike, û bi awayekî rêzdarî wan terman vegerîne, her wiha misogerkirina mafê wan ê qerbokirinê, hember ziyana madî û manewî ya li wan bûye, û tawan dubare nebe.
Jêder: Ofîsa Ragihandinê ya Hevbendiya Niştimanî ya Sûrî
