Şanderê NY bo karûbarê Sûriyê, Stîvan Dî Mestora xweşhaliya xwe anî ziman derbarê agirbesta di navbera opozisyiona Sûriyê û rijêma Esed de, ya duhî roja pêncşemê hatî ragihandin, û “hêvî kir ku ev yek rê li pêş pêşkêşkirina alîkariyan ji sivîlan re veke “, yên ku rastî gelek şêweyên kuştin û teror û wêrankariyan di salên şoreşê de hatin, bi destê Rijêmê û çeteyên mezhebperist yên ji gelek dewletan hatine.
Û Waşinton jî pesnê rêkeftinê da û hêvî kir ku hemû alî bi naveroka wê pabend bin, û berdevkê Wezereta derve Mark Toner dît ku agirbest dibe pêşketinek erênî û destxweşî da her bizava ji bo rawestandina tundutîjiyê û rizgarkirina canê mirovan û amadekirina keş û seqayan bo dubare destpêkirina danustandinên siyasî di navbera herdu aliyan de.
Ji aliyê xwe ve, serokê komîteya serbixwe ya lêkolînên binpêkirinên li Sûriyê, Pawlo Sêrciyo Bînîro, hêviyên xwe anîn der li hember peydakirina xweşiyê di sala nû de, û diyar kir ku sala 2016 sebaret sivîlên Sûriyê ya bobilatirîn sal bû”, ku têde gelê Sûriyê bi zarok kalemêr û jinan ve rastî şerek hovane ji aliyê rijêma Esed û milîsên mezhebperist hatin, û têde bi sedhezaran xelk ji malên xwe hatin koçberkirin.
Di heman mijarê de, wezîrê derve yê Qeterê Şêx Mihemed kurê Abdulrehmanê duwem, xweşhaliya xwe nîşan da li hember agirbestê û tekezî kir li ser “giringiya pabendbûna rijêma Esed bi cîbecîkirina xalên wê hevdem ligel hewlên wê yên berdewam ji bo jinavbirina hewlên çareseriya siyasî”.
Li aliyek din, wezîrê dewletê yê Ordinê yê karubarên ragihandinê û berdevkê hikûmetê Mihemed Elmominî got ku “hikumeta Ordinê bihêvî ye ku ev pêgav bibe fakter bo sazkirina pêgavên rasteqîn û karîger ji bo pêkanîna çareseriya siyasî û bidawîkirina tirajîdiya xelkê Sûriyê ya berdewam ji şeş salan ve, û vegera hêviyan bi dabînkirina ewlehî û seqamgeriyê bo miletê Sûriyê yê bira”.
Û li hember destpêşxeriyên xwecihî û navdewletî yên dibin ji bo bidawîkirina bobelata mirovî ya xelkê Sûriyê li serê şeş salan têde dijî, Hevbendiya Niştimanî ya Hêzên Şoreş û Rikberiya Sûriyê rêz û sipasiya xwe nîşan da li hember bizavên dibin ji bo gihiştina rêkeftineka agirbestê ya giştgîr, ku têde sercem kar û kiryarên leşkerî li seranserê qada Sûriyê bêne rawestandin, bi taybetî destxweşî da hewlên Tirkiyê .
Hevbendiyê duhî di daxuyaniyekê de ji hemû aliyan daxwaza serxistin û pêgiriya bi birgên wê kir, ji bo têkşikandina hewlên Îranê û milîsên wê yên hewla dirêjkirin û gurkirina agirê tundutîjiyê didin, û herwiha Hevbendiyê tekez kir ku artêşa azad wê pabend be bi rêkeftina agirbestê, hevdem ku ewê bersivê bide hember her binpêkirineke bibe ji aliyê milîsên Îranê û yên Beşar, wek heman binpêkirinên berê.
Daxuyaniya Hevbendiya Niştimanî bal kişandibû ku agirbest, bi xwe birgek serekî ye ji birgên biryara 2254 ya Encûmena Asayîşa Navdewletî ya li sala 2015, û dibe binyat ji bo peydakirina seqayeke guncayî ji bo serxistina piroseya diyalogê, li kêleka rawestandina kiryarên koçberkirina neçarî, û gihandina alîkariyên mirovî bi çavdêriya NY ji navçeyên dorpêçkirî re, tevî herdu Xûta rojhilat û rojava û Medaya û Wadî Bereda li gundewarê Şamê û taxa Elwe’ir li Himusê û sercem navçeyên din.
Jêder: Nivîsîngeha Ragihandina Hevbendiya Niştimaniya Sûriyê / Wekalat
