Encûmena Xwecihî ya herêma Elmerc li Xûta rojhilat ya Şamê bang li Netewên Yekbûyî û rêkxistina UNICEF kir da alîkariyên xwarinê û yên bijîşkî û yên fêrkirinê bigihînin koçber û ziyanlêbûyên li herêmên dorpêçkirî û hişyarî da ji çêbûna bobelateke mirovî li herêmê.
Encûmenê di daxuyaniyeke xwe de diyar kir ko herêma Elmerc 29 bajarok û gund in, û hejmara niştecihên wê dora 200 hezar mirovî ye, lê ji 41 hezar mirovî pêve neman ye, û tekez kir ko êrîşên hêzên rêjîmê li ser beşên rojhilat ji karta Elmerc hiştin ko bi sedan malbatên li wir niştecih bûn ji malên xwe derkevin û koçber bibin..
Encûmenê bêtir got rêjîmê ne tenê xelk koçber kirine û çekên kîmawî û yên qedexeya navdewletî dijî wan bikar anîne lê belê nehiştiye karwanên alîkariyên mirovî yên navnetewî jî ji berî bêtir ji çar salan ve derbas bibin.
Hêzên Esed herêma Xûta rojhilat ji çend salan ve dorpêç kiriye, her weha operasiyoneke leşkerî li ser herêma Elmerc pêkanîye, û derbider jî li ser Rêyan û li hindirê turumbêlên xerabe dimînin piştî ko ji malên xwe koçber bûne bi sedema ko hêzên rêjîmê êrîşî herêma wan kirine.
Encûmena xwecihî di daxuyaniya xwe de ji encûmena ewlekariyê û dewletên cîhanê daxwaz kir ko cenga Esed li ser miletê Sûrî rawestînin, ya ko ji ber wê bi sedhezaran xelkên Sûrî hatine kuştin û bi milyonan koçber bûne.
Jêder: Nivîsgeha Ragihandinê ya Hevbendiya Niştimanî/Acans
