Rêxistina Lêborîna navdewletî “Amnesty” duhî roja pêncşemê daxuyaniyek belav kir, têde gotiye ku bombeyên napalim yên li kargehên Rûsî hatine çêkirin ji aliyê hêzên Beşar Esed li dijî Xûta rojhilat hatine bikaranîn, û bûne sedema kuştina 10 kesan bi kêmayî.
Amnesty gotiye ku bombebarankirina pir ya hêzên Beşar Esed li ser Xûta rojhilat ya her ji 14’ê çiriya paşiyê ve, bûye sedema kuştina zêdetir ji 130 şehîdî û ketina hejmareke mezin ji birîndaran.
Ji aliyê xwe ve, rojnameya “The Times” ya Birêtanî gotiye ku kirîza xwarinê dijwartirîn tişt e di şerê Rijêmê de, yê li dijî xelkê dorpêçkirî li Xûta dike, ku gelek zarok ji birçîna mirine, û bal kişandiye ku bedxwariniya zarokan her ji destpêka şoreşê de ji berî nêzîkî heft salan ve di pîstirîn dem re derbas dibe.
Raporta “Amnesty” tekez kiriye ku rêz li rêkeftina agirbestê ya roja çarşemê nehatiye girtin, û ligor dîdevanan ku ev rêkeftin ji aliyê hêzên Rijêmê hatiye binpêkirin, û tê zanîn ku Rijêm razî bibû derbarê ku êrîşên xwe li ser navçeyê rawestîne berî destpêkirina danustanên Cenêvê , tevî ku Xûta rojhilat her ji berî pênc heyvan ve ketiye di nav “navçeyên kêmkirina şer” de.
Hêjayê gotinê ye ku Tora Sûrî ya mafên mirov di raportekê de gotibû ku her ji 22’ê tîrmeha borî û heta sêşema borî, nekêmtir ji 14 komkujî û 53 êrîşan ji aliyê hêzên Beşar û hevalbenda wî Rûsiya li dijî navendên zindî li bajarê Xûta hatine pêkanîn, ku bêtir ji 7 avahiyên pizîşkî di nav wan de bûn.
Jêder: Ofîsa Ragihandina Hevbendiya Niştimanî
