Hevrêzkarê Girûpa Karûbarê Penaber û Derbideran ya Hevbendiya Niştimanî ya Sûrî Ehmed Bekûra, tekez kir ku girtiyên Sûrî di zindana Rumiye ya Libnanî de di şert û mercên dijwar de dijîn ji ber serederiya newekhevî û rewşa xirab a jiyanê li derdora wan.
Bakûra di daxuyaniyeke rojnamevanî de bal kişand ser wê yekê ku girtiyên Sûrî yên di zindana Rumiyê de kêmtirîn asta guhdanê jî nabînin, ku bû sedema mirina yek ji girtiyan di 31ê heyva tebaxê de, û piştre girtiyên mayî vê hefteyê dest bi gireva birçîbûnê kirin.
Bekûra daxwaz ji dadweriya Libnanê kir ku demekê ji cezayê heta hetayê re destnîşan bike, di dadgehkirin û dana cezayan de dereng nemîne û 6 mehên girtîgehê wek salekê hesab bikin.
Herweha Bekûra ji rêveberiya Girtîgeha Rumiyê xwest ku şert û mercên xwarin û dermankirinê baştir bike, û bi awayekî berdewam bijîşkek nobetdar hebe û sîstrma dermankirina destpêkî peyda bike, her weha dîtina çareyan ji bo başkirin û berfirehkirina avahiya girtîgehê, ji ber ku firebûna wê tenê têra 1500 girtî dike, lê hejmara girtiyan a niha ji 3 hezar û 700î bêhtir e.
Bekûra ji rêxistinên mirovî û mafnasî yên navneteweyî xwest ku rola wan ya çavdêriyê li ser rewşa trajîk a ku girtiyên Girtîgeha Rumiyê tê de dijîn hebe, û alîkariyê bikin di warê pêşkêşkirina alîkariyên mirovî û guhdana pizîşkî de.
Tê zanîn ku girtiyên sûrî yên di zindana Rumiye ya Libnanê de, bi armanca şermezarkirina rewşa mirovî ya xerab di hundirê girtîgehê de, ji ber tunebûna xizmetguzariyên tendirustî, xwarin û dermanan, û ev xemsarî bû sedema mirina gelek kesan, gireva birçîbûnê ragihandibûn.
Herweha girtiyan daxwaza hevdîtina ligel şandeke ofîsa serokwezîrê Libnanê kirin, da rewşa xwe ji wan re bêjin û daxwazên wan ji serokê Libnanê Necîb Mîqatî re veguhêzin.
Jêder: Ofîsa Ragihandinê ya Hevbendiya Niştimanî ya Sûrî
