Endamê desteya siyasî ya Hevbendiya Niştimanî ya Sûrî Ehmed Bekûra, tekezî li ser redkirina Hevbendiya Niştimanî ji her cure asayîkirina têkiliyan bi rêjîmê re kir, û dît ku ew gav dê desthilata rêjîmê bihêztir bike û êş û azarên miletê Sûrî yê ku tûşî zilm û kuştinê dibe zêdetir bike.
Di daxuyaniyeke rojnamevanî de ji rojnameya xwecihî “Enab Beladî” re, Bekûra tekez kir ku her hewlek ji bo asayîkirina peywendiyan bi rêjîmê re dê li ser hesabê maf û daxwazên gelê Sûriyê be, û bibe sedema kûrtirkirina qeyranan li şûna çareserkirina wan.
Herwiha tekezî li ser giringiya parastina yekrêzî û yekparçeyiya axa Sûriyê û karkirina li ser dîtina çareseriyeke siyasî ya dadmend û berdewam kir ku aştî û aramiyê ji bo tevahiya herêmê li gorî biryara navdewletî 2254 dabîn bike.
Û bal kişand ser wê yekê ku divê berjewendî û mafên gelê Sûriyê di serê pêşîneyên welatên dost de bimîne, tevlî Tirkiyê jî, û tekezî li ser giringiya piştevaniya navdewletî ji pirsa Sûriyê re û garantîkirina ku mafên Sûriyan di çi rêkeftinên paşerojê de neyên paşguhkirin kir.
Bekûra diyar kir ku hêzên şoreşger ên opozisyona Sûriyê hevkarekî bingehîn in di şerê li dijî rêxistinên terorîst de, lê di çarçoveya proseyeke siyasî de ku armanca wê pêkanîna daxwazên gelê Sûriyê be.
Û amaje bi wê yekê kir ku her hewlek bo rûbirûbûna terorê divê beşek ji stratejiyeke berfireh a ji bo bidestxistina aşitî û aramiya mayînde li Sûriyê be, û hêvî kir ku daxwazên gelê Sûriyê di rêza pêşîn a siyasetên Tirkiyê de bimînin, bi taybetî di warê pêkanîna aştî û aramîyê û misogerkirina vegera bi dilxwazî ya penaberan bo cihên wan ên resen bi awayek ewle û rûmetdar.
Jêder: Ofîsa Ragihandinê ya Hevbendiya Niştimanî ya Sûrî
