Hevrêzkarê Girûpa Karûbarên Koçber û Penaberan di Hevbendiya Niştimanî ya Sûrî de Ehmed Bekûra, pêşwazî li daxuyaniyên Rêxistina Lêborîna Navdewletî û Komisyona Lêpirsînê ya Navdewletî ya derbarê Sûriyê kir, ya ji bo redkirina biryar û kiryarên desthilata Libnanî yên dijî penaberên Sûriyê yên li ser xaka wê bi rêya dersînorkirina wan bi darê zorê bo deverên rêjîma Esed.
Bekûra di daxuyaniyeke rojnamevanî de tekezî li ser wê yekê kir ku divê rêkxistinên navdewletî yên pêwendîdar bi mafên mirovan tev bigerin ji bo ronîdana ser binpêkirinên ku dibe bighên asta tawanên demdirêj, ji ber ku raportan tekez kirine ku kesên vedigerin deverên jêr kontrola rêjîmê rastî girtin, îşkence û kuştinê jî tên.
Bekûra got ku rayedarên Libnanê beşeke bingehîn ji pirsgirêka penaberên Sûriyê li Libnanê ne, ji ber ku milîsên Hizbullah ku beşek ji hikûmeta Libnanê ye, bandora wan bi awayekî xurt li ser koçberkirina xelkê bajarên Qelemon, Qisêr û hejmarek bajarên din heye.
Bekûra amaje bi wê yekê jî kir ku pêwîst e desthilatên Libnanî ji bo dîtina çareseriyan hevkariyê bikin, û penaberên Sûrî li Libnanê nekin behane ji bo veşartina pirsgirêkên xwe yên navxweyî, nemaze ku serokê Hevbendiya Niştimanî Hadî El- Behra, destpêşxeriyek ragihandiye û ji serokwezîrê hikûmeta demkî ya Libnanê Necîb Mikatî re şandiye.
Rêxistina Lêborîna Navdewletî roja Duşemê li ser platforma “X” got ku ragihandina desthilatên Libnanî derbarê vegerandina bidilxwazî ya penaberên Sûrî bo welatê wan nîgeraniyê zêde dike. Ji ber şert û mercên dijwar ên ku penaber li Libnanê rastî wan tên, û tekez kir ku Sûriye hîn ne ewle ye, ji ber ku berê îşkence, destdirêjiya sêksî, windakirina bi zorê, û girtinên kotekî yên ku penaberên Sûrî rastî wan hatine piştî vegera wan bo deverên rejîmê belge kiribûn.
Rêxistinê tekez kir ku yasaya navdewletî vegerandina destçêker qedexe dike, ku dewlet rêyên nerasterast bikar tînin daku xelkê neçar bikin ku vegerin cîhekî ku ew lê rastî metirsiya binpêkirinên cidî yên mafên mirovan werin.
Û her weha got ku desthilatên Libnanî bi riya asankirina vegerê, penaberên Sûrî dixin ber metirsiya binpêkirinên giran ên mafên mirovan, û tekez kir ku divê Libnan rêzê li erkên xwe yên li gorî yasayên navdewletî bigire û vegerandina penaberên Sûrî ya bi komî bo welatê wan rawestîne.
Di heman demê de, Komîsyona Navdewletî ya Lêpirsînê ji bo Sûriyê li ser platforma “X” tekez kir ku Sûriye hîn ji bo vegera penaberan ne ewle ye, û tekez kir ku sivîlên li Sûriyê derdê bêewlehiyê û nebûna yasayê dikşînin.
Jêder: Ofîsa Ragihandinê ya Hevbendiya Niştimanî ya Sûrî
