Koordînatorê Girûpa Karûbarên Penaber û Derbideran di Hevbendiya Niştimanî ya Sûrî de Ehmed Bekûra, diyar kir ku nûçeyên ku ji gelek welatan tên, ji wan Libnan, Nemsa û Qubris, gelekî nîgeraniyê peyda dikin ji ber ku ew Sûriyê wek welatekî ewle dibînin û dixwazin penaberên sûrî vegerin deverên xwe.
Bekûra di daxuyaniyeke rojnamevanî de amaje bi wê yekê kir ku bandorên derûnî yên xerab ên van nûçeyan hene û tevaya Sûriyan li seranserî cîhanê pê diêşin, nemaze di dema ku ew di rewşeke derûnî ya nebaş de ne ji encama şerê rêjîma Esed û alîkarên wê li dijî wan ji berî bêhtir ji deh salan de.
Bekûra amaje bi wê yekê kir ku ewlehî ne bêjeyeke siyasî ye, lê belê ew têgeheke teknîkî ye û aliyên wê yên ewlekarî, civakî û yasayî hene, û wiha berdewam kir: “Li şûna ku em helwestekê pev re bistînin û pê hewl bidin êş û azarên gelê Sûriyê bi dawî bikin, em dibînin ku gavên yekalî yên ku êş û azarên Sûrîyan girantir dikin û dibin gef li ser aramîya herêmê tên avêtin.” Û tekez kir ku çareseriya siyasî kevirê bingehîn e ji bo avakirina aşitîyê li Sûrîyê û ev yek hewcedarî pabendiyeke rasteqîn e ji tevaya aliyên peywendîdar.
Bekûra tekez kir ku vegerandina penaberan bo welatekî ne ewle binpêkirineke eşkere ji yasayên navdewletî re ye, di nav de Peymana Netewên Yekgirtî û Peymana Penaberan ya sala 1951, û got ku vegerandina penaberên Sûriyê di şert û mercên niha de ne çareserî ye, lê belê paşxistina pirsgirêkeke metirsîdar e û dê qeyrana mirovî girantir bike û aramiyê bêhtir têk bide.
Bekûra tekez kir ku paşguhkirina karesata Sûriyan û giringînedana ewlehî û aramiya wan, ne tenê binpêkirineke ji mafên mirovan re, lê belê destpêka encamin bobelatî ye û dê bandora wan li ser tevaya herêmê demeke dirêj bimîne.
Bekûra civaka navdewletî wek berpirsa parastina penaberan û dabînkirina vegera wan a ewle û bi dilxwazî dema ku şert û mercên guncaw peyda bibin dît, û bang li hemû welatan kir ku rêzê li yasayên navdewletî û mafên mirovan bigirin, û gavên bi bandor bavêjin ber bi cîbicîkirina biryara navdewletî 2254 û gihiştina veguhestina siyasî ya tam a ku aştiya berdewam li welat peyda bike.
Jêder: Ofîsa Ragihandinê ya Hevbendiya Niştimanî ya Sûrî
