Tora Sûrî ya Mafên Mirovan, tekez kir ku vegerandina karkirina bi bernameya vegera bi dilxwazî ya ku ji aliyê Rêveberiya Giştî ya Ewlekariya Libnanî ve ji sala 2017an de pêk tê, metirsiyeke cidî li ser çarenivîsa kesên ku vedigerin çêdike, û saziya mafnasî bal kişand ser ku wê herî kêm 208 bûyerên girtina kotekî di heyva cotmeha 2022an de belge kirine, 7 zarok û 5 jin di nav wan de hebûn.
Û saziyê di raporta xwe ya duh derketiye de got ku rewşa 124 girtiyan ji 208an bûye windakirina bi darê zorê, 86 ji wan li ser destê hêzên rijêma Esed bûn, 49 li ser destê Heyet Tehrîr Elşam, û 46ên ku 7 zarok di nav wan de hebûn, li ser destê milîsên PYDe bûn, û raporê 27 bûyerên girtinê ku jinek di nav wan de hebû li ser destê çekdarin dîtir hatibûn girtin, tomar kirine.
Û raporê diyar kir ku hêzên rijêma Esed dest ji peyketin û armanckirina sivîlan li deverên di bin kontrola xwe de, bi sedema rikberiya wan ya siyasî bernedane, û ev yek diçespîne ku ti welatiyekî Sûrî nikare xwe ji girtina rêjêmê ewle û parastî bibîne.
Û rapora mafnasî got ku bi hebûna heman dezgehên ewlekariyê yên ku ji sala 2011an ve tawanên dijî mirovatiyê pêk tînin û heta niha jî berdewam in, ti aramî û ewlehî dabîn nabe.
Û raporê destnîşan kir ku milîsên PYDe di heyva cotmehê de siyaseta xwe ya girtina kotekî û windakirina bi darê zorê berdewam kir, û helmetên êrîşan li dijî sivîlan bi behaneya şerê rêxistina DAIŞê pêk anîn.
Û raporê bal kişand ser ku Heyet Tehrîr Elşam bi helmetên girtinê dermafê sivîlan rabû, û bêhtirê girtinên wê li parêzgeha Idlibê bûn, û çalakvan û rojnamevan û siyasetmedar armanc kirin, û bi taybetî li dijî kesên ne bi nerînên wê re bûn û siyaseta rêvebiriya Heyet Tehrîr Elşam li deverên di bin kontirola wê de rexne kirine.
Û Tora Sûrî ya Mafên Mirovan, di rapora xwe de, ji Encumena Ewlekariyê ya Navdewletî xwest ku cîbicîkirina biryarên xwe nemaze yên hejmarên 2042 ,2043, 2139 bişopîne, û cextî li ser pêwîstiya serbestberdana zarok û jinan û rawestandina girtina malbat û dostan wek giraw û rehîneyên cengê kir.
Jêder: Ofîsa Ragihandinê ya Hevbendiya Niştimanî ya Sûrî
