Berpirsên Hevbendiya Niştimanî ya hêzên şoreş û rikberiya Sûriyê, nerastiya nûçeya rawestandina êrîşên terorîstî yên rijêma Esed û Rûsiya û milîsên Îranê li ser Helebê diyar kirin.
Osama Tilco îro di daxuyaniyek taybet de got ku “oparesyonên leşkerî li ser Helebê berdewam in, û taxa Şêx Se’îd û Cib Elciblî hatin bombebarankirin”, û bal kişand ku hêzên Esed û milîsên Îranê, ji du teweran ve êrîşî ser çend taxên Helebê kirin, û ew bi xwe jî rastî bobebarankirinê hatin.
Tilco daxwaza derxistina biryareka ferzkirinê ji NY kir, ku têde bi awayekî bilez daxwaza rawestandina êrîşan li ser sivîlan bête kirin, û herwiha xistina fişaran li ser Rûsiya ji bo rawestandina piştgiriya xwe ji wan êrîşên terorîst re, yên heta niha bûne sedema kuştina zêdetir ji 1000 sivîlî di heyamê sê heftiyên bûrî de.
Li aliyek din, serokê komîteya yasayî ya Hevbendiya Niştimanî Heysem Elmalih, dît ku Rûsiya di “derewan”de li ser xelkê Sûriyê û civaka navdewletî berdewam e, û her ji destpêkê de piştgiriya Esed hilbijartiye, ji ber ku ligel rêbaza wê digunce, herwiha Beşar Esed bi heman şêweyê Filadîmêr Botîn yê “Mafiyawî” difikire.
Elmalih got: ku “Rûsiya wê nehêle gelê Sûriyê biryara çarenivîsa xwe bide, ji ber ku ew dibîne ku mana wê di Sûriyê de tiştekî serekî ye, û got ku Mosko dixwaze bighê armanca xwe, bi çi riyê be ne xem e jê re, û bal kişand ku êrîşên terorîstî ranewestiyane, ne li ser Helebê û nejî li ser bajarên sûriyê yên din.
Û endama Hevbendiya Niştimanî “Kifah Murad” tekez kir ku Rûsiya oparesyonên xwe yên li dijî sivîlan ranawestîne, heger neçar nebe û nekeve bin fişarên rasteqîn yên civaka navdewletî, û bal kişand ku takerêya îro ya li pêşiya xelkê maye bitenê xweragirî û berxwedana li dijî hêzên Esed û milîsên mezhebperist e.
Jêder: Nivîsîngeha Ragihandina Hevbendiya Niştimaniya Sûriyê