Desteya bilind ya danustandinan diyar kir ku wê lênêrînek giştgîr ji cêbicêkirina piroseya siyasî re amade kiriye, û tekez kir ku têde û di pêşiyê de dakokî hatiye kirin li ser dijberiya terorê û tevî terora dewletê ya rêjîma Esed bikartîne û dibe jîngehek ji bona xudankirina tundrewiyê û nakokiyên tayifeprestî.
Desteya bilind duhî di daxuyaniyekê de, bal kişand ku amadekirina vê lênêrînê tê wek tekeziyekê ji aliyê wê ve li ser pêşvebirina pêvajoya siyasî, û cext kir ku cêbicêkirina birgên mirovî û biryarên encûmena ewlekariyê dibin yekemîn pêgav ber bi jinavbirina diyardeya tundrewiyê, lewra desteyê da zanîn ku danustandin li ser vê diyardeyê nabe, û daxwaza cêbicêkirina wê ya bilez û bêmerc kir.
Di civîna xwe ya dawiyê de ya di navbera 15 – 18’ê tîrmehê de, Desteyê di daxuyaniya xwe de bal kişandibû ku endamên wê derfet vekirine ji bo himbêzkirina hemû pêkhateyên civaka Sûriyê, û herwiha gengeşekirina asoyên pêvajoya siyasî ligel baredox û pêşhatên xwecihî û herêmî û navdewletî yên niha.
Herwiha desteyê pabendiya xwe bi çareseriya siyasî û berdewamiya xwe di piroseya danustandinan de tekez kir, û dubare daxwaz ji civaka navdewletî kir ji bona rakirina kosp û keleman ji pêş destpêkirina danustandinan, nemaze pirsên girêdayî bi cêbicêkirina birgên mirovî 12 û 13 û 14 ji biryara 2254 ya encûmena ewlekariyê.
Herwiha desteyê tekezî li ser giringiya çareserkirina kêşeyên dikevin di riya pêşvebirina danustandinên bûrî de kir, wek destnîşankirina dem û karnameyek diyar ji bona pêkanîna piroseya veguhestina siyasî ligor daxuyaniya Jinêv (30/6/2012) û ligor biryarên navdewletî yên pêwendîdar, bi rêka damezrandina desteyeka hikumraniya veguhêz yekser piştî çûna Bişar Esed û desteka wî ya beşdar di rijandina xwîna xelkê Sûriyê de.
Duhî êvarî û ligor daxuyaniya desteyê , Riyad Hicab, rêxerê desteya bilind, di pêwendiyeke xwe de bi telefonê, karnameya desteyê ji wezîrê derve yê Birêtaniya Borîs Conson re pêşkêş kir.
Hicab ji wezîrê derve yê Birêtaniya re pabendiya desteyê bi piroseya siyasî û pêdagiriya wê bi berdewamiya piroseyê ji bo encamdana veguhestina siyasî tekez kir, ya ji bo veguhestina Sûriyê ji dewleteke di destê kesekî de , ber bi dewleta dad û welatîbûnê bo tevaya xelkê Sûriyê û têde yasa serwer be.
Û amaje kir ku veguhestina siyasî wê bê cudahî û dûrxistin rê li pêşiya xelkê Sûriyê bo avakirina welatê xwe veke, û ji bona vegerandina penaberên hatine awarekirin bi destê Esed û hevalbendên wî jî Rûs û Îran û milisên tayifeperist yên bi kuştin û talankirin û koçbarkirina xelkê Sûriyê radibin.
Dubare tekez kir ku veguhestina siyasî ji dirustkirina desteya hikumraniya veguhêz ya bi tevaya desthilatan û bê rol û hebûn Esed û her yek ji tawanbarên kuştina gelê Sûriyê dest pê dike.
Daxuyaniyê bal kişandibû ku wezîrê derve yê Birêtaniya carek din helwesta Birêtaniya ya piştgir ji veguhestina siyasî û bi dawîkirina tiradijiya xelkê Sûriyê bi zûtirîn dem dupat kir, û cext li ser wê yekê kir ku ya pêwîst e veguhestina siyasî ya serkeftî be û ya bête cêbicêkirin û têde çûna Esed bê misogerkirin.
Ligor daxuyaniya desteyê ku herdu aliyan pêwendiya xwe ya bi telefonî bidawî kirin, bi rêkeftina li ser berdewamiya alîkarî û şêwirdariyê û amadekirina zemîn û jîngeheka guncayî ji bona destpêkirina danustandinan û xweşkirina rewşa mirovî ya sercem xelkê Sûriyê, û pêkanîna veguhestina siyasî ya çaverêkirî.
Jêder: Hevbendî
