Desteya bilind ya danustandinan ragihand ku ew “beşdar nabe di her civînekê de dûrî sîbera NY “, û Rûsiya tometbar kir ku” ew dixwaze careke din rijêma Esed bide pêş”, û daxwaz ji NY kir ku dîsa piroseya aştiyê li Sûriyê têxe bin kontrola xwe.
Desteya bilind duhî roja pêncşemê di daxuyaniyekê de got ku “Rûsiya rola NY lawaz dike, bi sepandina mercên xwe yên taybet li ser Sûriyê”, ya nêzî nîv milyon kes lê hatine kuştin bi sedema şerê rijêma Esed li dijî gelê Sûriyê bi dirêjahiya heft salan.
Desteya bilind got ku ew kongirê Rûsiya hewl dide 18’ê vê heyvê li havîngeha Sûtçî ya li ser derya reş li dar bixe, ” dibe wek jirêderxistina pêvajoya aştiyê ya bi çavdêriya NY“.
Desteya bilind dubare gengeşekirina paşeroja Sûriyê ji derveyî çarçovê navnetewî û yasayî red kir, û dît ku kongirê Sûtçî ji bo dûrxistina çareseriya siyasî ye, û careke din pabendbûna xwe bi çareseriya siyasî ligor daxuyaniya Cinêv ya sala 2012 an û biryarên navdewletî dupat kir.
Desteyê bal kişand ser ku kongirê navhatî dikeve di çarçova bizavên Rûsiya de yên ji bo sepandina baldestiya xwe ya bi tenê li ser çareseriyekê ne li bin sîbera NY, û têkbirina bizavên civaka navdewletî yên ji bo dîtina çareseriya siyasî û misogerkirina mafên gelê Sûriyê yên ji bo azadî û rûmetê.
Desteya bilind ya danustandinan û gelek hêzên opozisyonê daxwaz kirin ku çi piroseya hebe divê di çarçova biryara encûmena ewlehiyê ya hejmar 2254 de be, û tekez kir ku bobelata gelê Sûriyê tenê bi rêka pêkanîna hikûmeteke berfereh ya ne li bin sîbera rijêma Esed çareser dibe.
Jêder: Ofîsa Ragihandinê ya Hevbendiya Niştimanî
