Duh, duşemê, şandeke Desteya Danûstandinan a Sûrî ligel şanderê navdewletî yê taybet bo Sûriyê Geir Pedersen û şanda pê re li Şamê civînek lidar xist û pêşhatên dawî yên li Sûriyê di hemû waran de hatin gotûbêjkirin.
Di destpêka civînê de, şanda desteya danûstandinan ku ji hejmarek endamên desteyê pêk dihat, pîrozbahî dan gelê Sûriyê li ser serkeftinên wan ên hêja yên ku di encama têkoşîneke dûr û dirêj a gelê Sûriyê di 14 salên şoreşê de, û têkoşîna opozisyona Sûriyê ya bi dehên salan beriya şoreşê jî, tê de gelê Sûriyê ji bo azadî û rizgariya ji stemkariyê xwîn rijand û gelek qurbanî dan .
Şanda desteyê tekezî li ser pêwîstiya pêşkêşkirina alîkariyên mirovî yên bilez ji bo Sûriyan kir piştî ku rêjîma Esed dewlet wêran kir û aborî û jêrxana wê talan kir, û dabînkirina dadweriyê ji hemû kesên ku bi sedema şer, tundûtûjî û tawankariya rejîmê rastî binpêkirinan hatine, û diyar kir ku dadweriya veguhêz tenê bi wê yekê nayê sînordarkirin, ji ber ku ew proses ne tenê bi dadgehkirin û sizadana sembolên rejîmê ye, lê ew komek tedbîrên ji bo rêgirtina li ber dubarenebûna tawanên rêjîmê ye, ku tawanên cengê û tawanên dijî mirovatiyê di nav wan de hene.
Şanda desteyê behsa rewşa Sûriyê ya niha ji aliyê ewlekarî û siyasî ve kir, û xalên biryara Encûmena Asayişa Navdewletî ya jimare 2254 gotûbêj kirin, ku tê de nexşerêyeke baş û cîbicîkar heye ku ji aliyê hemû Sûriyan ve tê qebûlkirin, bêyî ku Rejîma hilweşiyayî têde hebe.
Şanda desteyê tekez kir ku cîbicîkirina biryara 2254 bêyî hebûna rêjîmê bi sedema jinavbirina wê, tê wateya ku ti aliyek nîne ku bikaribe rêgiriyê li cîbicîkirina wê bike, û mijar tenê di destê pêkhateyên hêzên şoreşger de ye, yên ku nûneratiya aliyên siyasî, sivîl û leşkerî yên ji pêkhateyên gelê Sûriyê berhev dibe dikin, û di berjewendiya gelê Sûriyê û hêzên şoreşger de ye ku di demek herî kurt de, bi rêya proseyeke siyasî û bi serpereştiya Sûriyan pêk were, û bi rêya diyalogeke Sûrî ku ne ji aliyê Netewên Yekbûyî ve tê kontrolkirin, belku asankarî û xizmetên şêwirmendiyê tenê pêşkêşî wê bike.
Şandeyê daxwaz kir ku nûnerê navdewletî ji bo Sûriyê hêsankariyan ji bo diyaloga di navbera hemû aliyên Sûriyê de peyda bike, ji bo destpêkirina avakirina desteya rêveberiya veguhêz ya hevbeş û dabînkirina jîngeheke ewle û bêalî, komîteyek ji hiqûqnas û pisporan jê bê bijartin ji bo ku destûreke nû ya nûjen ji Sûriyê re bê amadekirin, û bibe sedema destpêkirinna hilbijartinên azad û dadane di bin çavdêriya Neteweyên Yekbûyî de.
Ji aliyê xwe ve, şanda navdewletî ji bo Sûriyê ji şanda desteyê re behsa zincîre civînên xwe yên ku li Şamê pêk anîn û dê lidar bixin kir, û gelek bîr û baweriyên li ser rêyên pêşdebirina proseya siyasî li gorî rêgez û yasayên avakirina qonaxa veguhêz û rêyên aktîvkirina diyalogê di navbera aliyên sûrî de hatin guftûgokirin.
Pedersen tekezî li ser pêwîstiya veguhestina siyasî ya berfireh û pêbawer di bin serpereştiya Sûriyan de û li ser bingeha pirensîpên ku di biryara jimare 2254 ya Encûmena Ewlekariyê de hene, û herwiha tekezî li ser niyeta Netewên Yekgirtî ji bo pêşkêşkirina hemû alîkariyan bo gelê Sûriyê kir.
Jêder: Ofîsa Ragihandinê ya Hevbendiya Niştimanî ya Sûrî
