Sekreterê desteya siyasî ya Hevbendiya Niştimanî ya Sûrî Ebdilbasset Ebdulletîf, tekez kir ku tawanên rêjîma Esed û hevparên wê li dijî sivîlan li navçeyên rizgarkirî berdewam in û ranewestiyane, û tekez kir ku êrîşên wan ên leşkerî li derveyî yasayê pêk tên ji ber ku ew herêmên sivîl ên ne leşkerî armanc dikin.
Ebdulletîf di daxuyaniyeke rojnamevanî de amaje bi wê yekê kir ku rêjîma Esed û hevkarên wê weke her car li meydanan şer nakin, ew êrişên xwe li dijî sivîlan pêk tînin, jin, zarok û kal û pîran û deverên xizmetkarîyên jiyanê wek nexweşxaneyan, dibistan û malan armanc dikin, bi mebesta sepandina fişarê li ser fesîleyan ji bo rawestandina şerên rizgarkirinê.
Ebdulletîf diyar kir ku dibe berdewamiya bêhelwestiya navdewletî di rûbirûbûna tawanên Esed de encamên nerênî ji hemû welatan peyda bike, û ev mijareke girîng e ku divê bi awayekî cidî û bilez serederî pê re bibe, û daxwaza aktîvkirina proseya siyasî û danîna mîkanîzmayên neçarkirina rêjîma Esed li gorî xala heftan ji bo cîbicîkirina tam ji biryara navdewletî ya 2254ê re kir.
Li gorî nûçeya “Syria TV” ji 27’ê mijdarê heta 2’ê Kanûnê hejmara şehîdên ji encama êrîşên rêjîma Esed û Rûsyayê li ser Idlibê û gundewarê wê û gundewarên Helebê, gihaştiye 81 sivîlan, 34 zarok, 12 jin û 35 mêr di nav wan de hene, her weha 304 birîndar jî hene, 120 zarok in 78 jin û 106 mêr in, û ev amar qurbaniyên bajarê Helebê li xwe nagire.
Li gorî Berevaniya Sivîl a Sûriyê, wan êrîşan deverên niştecihbûnê, navendên bijîşkî, kampên awareyan, bazar, û perestgeh kirine armanc.
Jêder: Ofîsa Ragihandinê ya Hevbendiya Niştimanî ya Sûrî
