Serokê Hevbendiya Niştimanî ya Sûrî Hadî El-Behra, tekez kir ko giringtirîn pêşindeya ko Hevbendiya Niştimanî ji bo wê kar dike ew e, guhertina ketwara Sûriyê bi awayekî ku bibe egera guhertina siyasetên navdewletî ber bi bilindkirina dosya Sûriyê di lîsteya qeyranên navneteweyî de, ji bo bihêle welatên cîhanê berê xwe bidin siyasetên bibandor derbarê çareseriya siyasî di riya cîbicîkirina biryara 2254 bi awayekî tam.
El-Behra di daxuyaniyeke rojnamevanî ji rojnameya xwecihî “Hibir” re, amaje bi wê yekê kir ku herêmên rizgarkirî û gelê Sûriyê xalên pêşîn ên ku ew ji 5 mehên borî de (destpêkirina rola nû di Hevbendiya Niştimanî de) li ser kar dikin. û berdewam kir û got: “Min pir giringî da ku ez mekanîzmayên peywendiyan û civînên rolane bi hemû çalakiyên sivîl û siyasî yên sûrî re saz bikim, tevlî rêxistinên civaka sivîl û kesayetiyên çalak ên serbixwe yên li Sûriya û Tirkiyê, ji ber ku Tirkyê mêvandariya hejmara herî mezin a Sûriyan kiriye, da em karibin bi wan re nêrîn û serboran parve bikin derbarê xebatên ku em ji bo Sûriya ku em dixwazin bikin .”
El-Behra diyar kir ku wî di heyama dawî de bi encumanên xwecihî, odeyên bazirganî û pîşesazî, hejmarek karsaz, Encumana Êl û Eşîran, rêxistinên sûrî, sendîka, federasyonên ciwanan û revendên sûrî re hevdîtin pêk anîn, û tekezî li ser guhdarîkirin û têgihiştina pêdawîstî û hêviyên Sûriyan ji bo xebateke biencamtir û bêhtir cihê baweriyê kir.
Û amaje bi wê yekê jî kir ku piroseya siyasî jî yek ji pêşindeyan e, û bal kişand ser pêwîstiya parastina biryarên 2118 û 2254 yên Encûmena Ewlekariyê û zindîhiştina wan û nehiştina paşguhkirina wan, ji ber ku ew bingeh in ji bo daxwazên gelê Sûriyê û armancên şoreşê û bidestxistina dadwerî, serweriya yasayê û veguhestina siyasî ber bi sîstemeke demoqratî ya desthilatê ya li ser bingeha piralîbûna siyasî û avakirina dewleta hevwelatîbûna wekhev, di bin siya destûreke ku azadiya Sûriyan garantî dike û rûmeta wan a mirovî diparêze û mafên wan misoger dike.
Her wiha tekez kir ku pirsa girtiyan ji bo hemû gelê Sûriyê giringtirîn pirse û got: “Em her dem wê di serê lîsteya pêşindeyan de datînin, em daxwaz dikin ku di hemû hevdîtin û civînên fermî û navdewletî de pêşketinek têde peyda bibe, û em tekeziyê li ser pêwîstiya dîtina çareseriyekê ji kok de û bilez jê re dikin, lê mixabin ev mijar hê jî êsîra siyasetên rejîma tawankar e û nahêle pêşde biçe.”
El-Behra bal kişand ser wê yekê ku mijara girtiyan di heman demê de bindesta astengkirina cîbicîkirina biryarên navdewletî di Encûmena Ewlekariyê de ye, û tekezî li ser pêwîstiya hiştina wê wek mijara yekemîn û karkirina ji bo azadkirina girtiyan û naskirina çarenivîsa windayan bi hemû rêyên pêkan kir.
Û tekezî li ser giringiya geşepêdana bakurê Sûriyê kir, û destpêkirina çêkirina modeleke serkeftî ku nûnertiya Sûriya rasteqîne li deverên rizgarkirî bike, bi handana li ser veberhênanê û peydakirina jîngeheke ewle û aram, û karkirina ji bo piştgirîkirina jêrxan û xizmetguzariyan û sazîkirina dezgehên hikûmetê li Sûriyê bi awayekî rasteqîne, û bal kişand ser pêwîstiya piştevanîkirina karînên Hikûmeta Demkî û çavkaniyên wê ji bo karibe planên geşepêdanê cîbicî bike.
El-Behra dît ku serkeftina di cîbicîkirina vê nerînê de dê ji cîhanê û Sûriyan re diyar bike ka em Sûriyake çawa dixwazin, û çawa sûrî dikarin wê birêve bibin, dema ku em wê bi tevahî azad bikin bi rengekî ku pêşketin û geşepêdan û bexteweriyê ji hevwelatiyên ji hemû pêkhate û mezheban re bê cudahî û dûrxistin peyda bikin, û tekez kir ku pêwîstiya pêkanîna wan karên mezin tevan bi beşdariya her kesî heye, sazî, rêxistin, partî, komele, yekîtî û kesên xwedan ezmûn û şiyan.
Jêder: Ofîsa Ragihandinê ya Hevbendiya Niştimanî ya Sûrî
