Yasir Elferhan hevrêzkarê desteya niştimanî ya karûbarê winda û girtiyan ya Hevbendiya Niştimanî ya Hêzên şoreşê û rikberiya Sûriyê, siyaseta astengkirina berdewam derheqê penaberên Sûrî li Libnanê bi giştî û yên girtî bi taybetî pirotesto kir.
Elferhan got ko siyaseta astengkirina girtiyên Sûrî li Libnanê vê dawiyê bû sedem ko hinek girtî hewil bidin xwe bikujin, bi sedema ko desthilata Libnanî hinek hevalên wan ji zindana Romiyê radestî rêjîma Sûriyê kirin.
Elferhan got ko pirosesa radestkirina girtiyên Sûrî rewşeke tirsank di nav girtiyên din de çêkir, ji ber ew ditirsin ku radestî rijêma ku ew ji ber wê revuyane bibin.
Û Alferhan dibîne ko ev pêngaveke metirsîdar e, li dijî yasaya navdewletî ya mirovî û yasaya navdewletî ya mafên mirovan û herçar peymanên Cinêvê û peymana Cinêv ya karûbarê penaberan e, her weha li dijî pirinsîbên mirovî û sincên parastina penaberan e.
Elferhan tekez kir ko ew hêviya dadweriya Libnanê ya serbixwe dike, ya nekeve bin bandora fişarên aliyên siyasî yên dilxwazên rêjîma Sûrî ne.
Û destnîşan kir ko ev kar ne yasayî ye û Libnanê dike ber lêpirsînê li beraber civaka navdewletî, li gor peymanên li dijî êşkenceyê û dijî radestkirina penaberan bo dewleteke din in, dema ku radestkirin bihêle jiyana wan têkeve metirsiyê.
Elferhan ji desthilata Libnanê daxwaz kir ko pêrabûnên pêdivî bike tako nehêlin ev mijar dubare bibe, her weha ji rêkxistinên mirovî û desteyên mafnasiyê yên Libnanê daxwaz kir ko bi rola xwe rabin û kar bikin da nema ev kirdeyên radestkirina girtiyan dubare bibin.
Her weha ji civaka navdewletî daxwaz kir ko peydeçûna karûbarê girtiyan bike yên ko ji bo rêjîma Esed hatine radestkirin, û çarenivîsa wan aşkere bibe û bêne parastin.
Tê zanîn ku hejmarek girtiyên Sûrî yên zindana Romiyê ya Libnanî hewil dan ko xwe bi darvekirinê bikujin, piştî ko desthilata Libnanê 5 hevalên wan radestî rêjîma Esed kirin, ev binpêkirineke aşkere ye ji yasaya navdewletî ya mafên mirovan re, bi taybetî madeya 3 ji peymana lidijî êşkenceyê ya ko Libnanê bi xwe pesend kiriye û soz daye ko pê pabend be.
Jêder: Ofêsa Ragehandinê ya Hevbendiya Niştimanî
