Endamê Desteya siyasî ya Hevbendiya Niştimanî Fûad Elîko, hişyarî da ji bo bobelata ko li Helebê çêbibe, bi sedema êrîşên hovane yên Rêjîma Esed û hevalbendên wî li ser bajêr. û rexneya dewletên hevalên gelê Sûriyê kir bi taybetî Yekîtiya Ewropî û Emerîka ko piştgiriya Opozisyonê ne ya siyasî û ne ya leşkerî nakin, beraber jî Rûsya û Îran piştgiriyeke bêhema ji Rêjîma Esed re dikin.
Çimkî Firokên dijminkar ên Rûsya û Rêjîma Esed Tax û Gundewarên Helebê doh amanc kirin, di encamê de bi kêmî 30 sivîl şehîd ketin û dora 100 sivîlên din birîndar bûn, hin ji wan rewşa wan di metirsiyê de ye.
Firokên dijminkar ên Rûsya û Rêjîma Esed, ji doh sibehê ve, bi bêtir ji 30 êrîşên asmanî dora 20 tax û bajarokên Helebê amanc kirin. Dîmenekî xwîndar li wan deveran çêbû û pir wêranî encam dan.
Bajarê Helebê û Gundewarê wê ji çend rojan ve ketine ber operasiyoneke leşkerî ji hêla Rûsya û Rêjîma Esed ve, bi amanca ko Herêmên rizgarbûyî vala bikin da derbasbûna wan hêsan bibe.
Nûçegihanê Kanala Eljazîre tekez kir ko pêzanîn hene dibêjin Efserekî Rûsî yî mezin serpereştiya operasiyonê li Helebê dike, ya ko bi êrîşên asmanî û yên zemînî dibe, wek ya ko li Herêma Hinderat li bakurî bajêr pêk tê.
Hêzên Esed bi hevkariya Rûsan û Milîtanên PYD, bizavê dikin dako rêka Kastîlo ya di navbera Helebê û Gundewarê wê yê Rojava de bigirin.
Elîko helwesta Opozisyonê ya ko redkirina vegera li danûstandinên Cinêvê bi Rêjîmê re dubare kir, ya bi mercê cîbicîkirina pabendiyên mirovî li gora movika 12 û 13 ji biryara Encûmena Ewlekariyê 2254.
Hem jî planek mercdar bi demek destnîşankirî ji operasiyona siyasî re heye, ya ko gerek bi damezirandina “Desteya Desthilatdar ya veguhêz” bêyî Esed û simbolên Rêjîma wî dest pê dike.
Jêder: Hevbendî+Acans
