Serokê Desteya danûstandinên Sûriyê, Nesr al-Herîrî, tekez kir ku derfet bo gihiştina çareseriyeke siyasî li welêt heye, û got: “Niha derfetek heye, ji ber ku niha li bakur- rojhilatê û bakurê Sûriyê agirbestek heye, û herwiha encamên baş bi dest bizavên dijî terorê hatine.”
Al-Herîrî, di hevpeyvînekê de ligel ajansa Reuters, got ku “Hemû welat, di nav de Tirkiye û heta radeyekê Rûsya jî û dewletên erebî, bawer dikin ku bêyî çareseriya siyasî dê asayîkirin bi rejîma Beşar Esed re bicarekî wê nebe”.
Al-Herîrî got, “Niha dem ji bo pêşketinên agirbestê û jinavbirina terorê hatiye, û baweriya piraniya gelê Sûriyê ew e ku tenê kirîza Sûriyê bi çareseriya siyasî ye”.
Tê zanîn ku desteya danûstandinan ya sûrî li roja Înê hevdîtin ligel Gere Pederson kiribû, yê li vê dawiyê piştî Staffan de Mistura wek nûnerê taybet ji bo Sûriyeyê hatiye destnîşankirin, û bi wî re hewldanên pêşketina pêvajoya siyasî û dûvçûna ramanên li ser pêvajoya siyasî hatin gotûbêjkirin.
Desteyê di daxuyaniyekê de amadebûna xwe ji bo berdewamiya têkiliya erênî bi nûnerê navnetewî re dupat kir, wek heman têkildariya ligel herdu nunerên berê, û bal kişand ku ev yek tê di çarçoveya “wendanekirina demên zêdetir”.
Herwihê tekezî li ser karê di bin sîbera Netewên Yekbûyî de li gor daxuyaniya Cenevre û hemû biryarên navnetewî yên girêdayî bi mijara Sûriyê ve kir, bi taybetî biryara navnetewî 2254, ya ku wek karnameya duristkirina çareseriya siyasî ya li ser hatiye lihevkirin tê dîtin.
Û bal kişand ser pêwîstiya berdewamiya karê ji bo duristkirina komîteya destûrî û bingehên şiklî yên karên wê yên siyasî û rêxistinî wek riya herî giring ya pêvajoya danustandinên siyasî, herweha vekirina rê ji bo temamkirina pêkanîna mijarên din, bi taybetî jî yên girêdayî bi mîkanizmên dabînkirina jîngeheke saxlem û bêalî ji bo referandoma li ser projeya destûrê, ya ku bibe destpêk bo veguhastina siyasî.
Jêder: Ofîsa Ragihandina Hevbendiya Niştimanî ya Sûriyê
