Îro roja duşemê Hevbendiya Niştimanî ya hêzên şoreş û rikberiya Sûriyê li paytexa Beljîka li Biroksilê, digel Desteya Hemahengiyê civiya, bi amadebûna sikirtêrê giştî yê têkiliyên derve yê Yekîtiya Ewropî “Alan Lî Rodî”, û amadebûyan tekezî li ser giringiya çareseriya siyasî û pirkirina hewl û bizavan di piroseya siyasî de kirin, ji bona bigehin çareseriyek siyasî ya dadmend têde dawî li bobilata Sûriyê bê, û daxwazên milet bêne dabînkirin.
Serokê Hevbendiya Niştimanî Enes Ele’bide diyar kir ku berdewamiya rêjîma Esed û Rûsiya li ser armanckirina sivîlan nîşana wê yekê ye ku pêvajoya gotubêjan gihiştiye riyeke girtî û ku têde hîç alî nikare bi ferzkirina rêkeftina agirbesta karên dijminkarî li ser rêjîmê û hevalbendên wê rabe.
Ele’bide bal kişand ku yek ji giringtirîn endamê civaka navdewletî yê çavdêr ji piroseya siyasî re (Rûsiya), bi xwe hevpar e di armanckirina sivîlan de, û got: hîç karvedanek navdewletî ya rasteqîn li ser binpêkirina biryara rawestandina Oparesyonên dijminkarî ji aliyê rêjîmê û hevalbendên wê nînin.
Ele’bide got ku pêwîst e Yekîtiya Ewropî bi parastina piroseya siyasî û rabe, û piştgiriya wê bike heta bigehe armanca xwe bo pêkanîna veguhestina siyasî û gihiştina çareseriyek siyasî ya dadperwer ku têde daxwazên gelê Sûriyê liberçav bêne girtin û bi mercê ku bête cêbicêkirin.
Herwiha dubare tekezî li ser giringiya rola Yekîtiya Ewropî kir ji bona rolek xwe ya giring hebe di piroseya siyasî de û ji bona pêşvebirina pêvahiya danustandinan, û bal kişand ku mana du yarîgeran bitenê (Rûsiya û Amerîka) wê encamên baş li pişt nebin û rûdanên di şeş heyvên bûrî de belge ne li ser vê yekê.
Serokê Hevbendiyê daxwaza gera li mîkanizmên karatir kir ji bona gihiştina çareseriyek siyasî ya dadperwer ji bercewendiya gelê Sûriyê û zarokên wê re, û herwiha ji bona rojhilateke navîn ya serbixwe û cîhaneke aramtir.
Ji aliyê xwe ve, rêxerê giştî yê Desteya Hemahengiyê Hesen Ebule’zîm cext li ser giringiya bizavan ji bona bidawîkirina parçebûna Opozisyonê kir, û terxankirina bizavan ji bona yekrêziyê Opozisyonê (ne ew opozisyona rêjîma Esed bi çêkirina wê radibe), ji bona bidawîkirina êşên gelê Sûriyê, û da zanîn ku ev hevdîtin dikeve di nav bizavên yekrêziya Opozisyonê de û yekxistina dîtin û helwest û bernameyê wê de, bi awayê bikeve di qazinca şanda danustandinkar de.
Ebule’zîm got ku.”Sûriya di doxeke metirsîdar de ku xwîn tê rijandin û bajar tên wêrankirin û hêzên terorîst navçeyan kontrol dikin û hin hêzên din dixwazin fedasyonê bisepînin”, hevdem tekezî li ser giringiya yekîtiya hemû hêzên Opozisyonê û li ser giringiya timamkirina nûnerayetiya kurdan kir, û ev tişt bi giringî li qelem da.
Navhatî bal kişand li ser destpêşxeriyên desteya bilind ya danustandinan ya di heftiya dawî de ji bona dirustkirina komîteyeke diyalogê digel hêzên amade nebûn di kongirê Riyad de, û dîtina yane û kesayetî û kenalên ragihandinê, û bal kişand ku kongirê Riyad pêgavekê baş bû lê pêwîstiya wê bi piştgiriyê heye, bi rêka van hevdîtinan bi destpêşxeriya aliyên Ewropî û navdewletî.
Li aliyek din, sikirtêrê têkiliyên derve yê Yekîtiya Ewropî Alan Lî Rodî got ku “demê destnîşankirî di heyva tabaxa bê de ji bona dirustkirina desteya hikumraniya veguhêz, zehmet bête cêbicêkirin, heger bizavên mezin terxan nebin ji bona vê armancê, û hevdem tekezî li ser giringiya hemahengiya karê Opozisyonê û dariştina lênerînek hevbeş ya ji çareseriya siyasî re kir.
Alan Lî Rodî got: “Em amade ne bo terxankirina hemû bizavên xwe ji bona bidawîkirina bobilata xelkê Sûriyê”, û amaje kir ku Yekîtiya Ewropî bi rolek giring dirabe di piroseya siyasî û di piştgiriya Opozisyona Sûriyê de ji bona gihiştina çareseriyek giştgîr.
Di dawiya axaftina xwe de niyaza nûnerayetiya bilind ya siyaseta derve ya Yekîtiya Ewropî Fidrîka Mogrînî anî ziman li ser niyaza yekîtiyê ji bona berferhkirina rola xwe di piştgiriya pêvajoya siyasî de û bi dawîkirina tirajêdika Sûriyê, tevî ku Yekîtî bi rolek mezin di biyavê mirovî de dirabe, ji bona sivikkirina êş û azarên miletê Sûriyê.
Jêder: Hevbenî
