Hevrêzkarê Girûpa Kar a Derbider û Penaberan ya Hevbendiya Niştimanî ya Sûrî, Ehmed Bekûra, raporta Wezareta Derve ya Almanî ya derbarê metirsiyên dersînorkirin û vegerandinê, ji ber ku garantî tune ne di dema ku rewşa mafên mirovan ya nebaş berdewam e, bilind nirxand.
Bekûra tekez kir ku raporta Wezareta Derve ya Almanya piştrast dike ku jîngeheke ewle û aram ji bo vegara bi dilxwazî û rûmetdar a penaberên Sûriyê, tenê bi dîtina çareseriyeke siyasî li welat pêk tê, bi rêya cîbicîkirina hemû biryarên navdewletî, bi taybetî daxuyaniya Cinêvê û biryarên 2118 û 2254, bi hebûna desteyeke rêveberî ya veguhêz a xwedî desthilatên cîbicîkirinê yên tam, û tekez kir ku “ewlehî” ne tenê navekî siyasî ye, lê belê ew agahî û rastiyên ku mirov di jiyana xwe ya rojane de dijî.
Bekûra bal kişand ser ku rapor asta êş û azarên gelê Sûriyê piştî 13 salan nîşan dide, ji ber berdewamiya tawankariyên ku li dijî sivîlan tên kirin, û jiyan li wî welatî bi belavbûna milîsan her weha hilweşîna aborî ya mezin di encama nehiştina çavkaniyên dewletê û xerçkirina wan di şerê rêjîmê yê dijî gel de, nepêkan e.
Bekûra li ser nûçeya rêkeftina vegerandina penaxwazên Sûriyê ji Qibrisê bo Libnanê daxwiyanî da, û raporta Wezareta Derve ya Almanyayê di bîr anî û got: “Çi prosesa vegerandina penaberên Sûriyê yên ku derbasî Qibrisê bûne bo Libnanê, dê jiyana wan bixe metirsiyê û her rêkeftinek li ser vê mijarê çêbibe, çarenûsa van penaberan dixe bin gefê de û qanûnên navneteweyî û yên Ewropayê binpê dike, û vegerandineke bi zorê ye, bêyî ku garantiya parastinê hebe.”
Wezareta Derve ya Almanya di raporta xwe de hişyarî da ji metirsiyên mezin ên dersînorkirin yan jî vegera “bi dilxwazî”a penaberên Sûriyê ji Almanya bo welatê wan, û tekez kir ku rewş hîn ne ewle ye.
Wezaretê diyar kir ku “vegera ewle ya penaberan di dema niha de an texmînkirina wê an jî taqîkirina wê li ser hin mirovan li çi devera Sûriyê nayê garantîkirin.”
Raporê diyar kir ku “rewşeke mirovî, aborî û mafnasî a bobelatî li piraniya deverên Sûriyê heye”, û anî ziman ku “ewlehiya kesane ya kesên vegeriyane di bin gefê de ye, ji ber ku rêjîm gelek caran wan wek xayin dibîne, lewra ew gelek caran rûbirûyê stemkariyeke sîstematîk a demdirêj dibin, ta radeya tunebûna mafan.”
Jêder: Ofîsa Ragihandinê ya Hevbendiya Niştimanî ya Sûrî
