Hevbendiya Niştimanî ya Sûrî hişyarî da derbarê operasiyonên gurkirina leşkerî ji aliyê rêjîma Esed ve li dijî navçeyên sivîl li bakurê rojavayê Sûriyê, û bang li civaka navdewletî kir ku tedbîrên tund werbigire ji bo rêgirtina li pêşiya rêjîmê û dadpirsîna wê û aktîvkirina piroseya siyasî.
Sekreterê desteya siyasî ya Hevbendiya Niştimanî Ebdilbasset Ebdulletîf got ku rêjîma Esed hîn jî hewl dide çareseriya siyasî paşde bixe û rêbaza leşkerî bişopîne û hemû biryarên navdewletî paşguh dike.
Ebdulletîf tekezî li ser pabendbûna Hevbendiya Niştimanî bi daxwazên şoreşa Sûriyê û hêviyên miletê wê kir ji bo bidestxistina veguhestina siyasî ya tam li Sûriyê ku azadî, rûmet û guhertina demokratîk dabîn bike bi rêya cîbicîkirina biryarên navdewletî yên têkildarî pirsa Sûriyê, bi taybetî jî Daxuyaniya Cinêvê û biryarên 2118 û 2254.
Berevaniya Sivîl a Sûrî raporek meydanî belav kir, tê de diyar kir ku rêjîmê sibeha pêncşemê, bi sê balafirên bêpîlot, gundewarê başûrê Idlibê, û otombîleke sivîlan li gundê Ferkiyê li Cebel El-Zawiyê û otomobîleke din a sivîlan li gundê Şananê kir armanc, û balafira bêpîlot a sêyem di nav zeviyeke çandiniyê de li derdora gundê Şenanê teqiya bê ku ziyan werin tomarkirin.
Berevaniya Sivîl bal kişand ser wê yekê ku balafirên şer ên Rûsî duh, çarşemê, êrîşên xwe li ser gundewarê Idlibê zêde kirin, di dema ku wan bi du êrîşên asmanî bi şev, dibistana duwenavîn a pîşeyî ya derveyî kar li derdora bajarê Cisir El-Şuxur li rojavayê Idlibê kir armanc û ziyanên mezin gihandin dibistanê bêyî ku ziyanên canî hebin.
Berevaniya Sivîl diyar kir ku balafirên şer ên Rûsî tektîkên nû û metirsîdar û cebilxaneyên ku teqînên mezin peyda dikin bi kar anîn, di heman demê de rêjîmê firokeyên bêfirokevan ên xwekuj ji bo armanckirina sivîlan û deverên niştecihan bikar anîn, û dît ku ev yek rewşa nearamiyê zêde dike û jiyana xelkê, perwerde û fêrkirina sivîlan, xebatên çandiniyê li gelek deverên bakurê rojavayê Sûriyê têk dibe, û hişyarî ji karesateke mirovî û pêleke nû ya koçberiyê da.
Jêder: Ofîsa Ragihandinê ya Hevbendiya Niştimanî ya Sûrî
