Serokê Hevbendiya Niştimanî ya Sûrî D. Nesir Elherîrî, civînek ji dûrve li gel Cîgira Emîndarê Giştî yê Netewên Yekbûyî Rose Merry DiCarlo li dar xist, û behsa dawîtirîn pêşhatên meydanî û siyasî li Sûriyê kirin.
Û di civînê de Hevrêzkarê Ofîsa Têkliyên Derve Ebdilehd Istêfo û Nûnera Hevbendiya Niştimanî li Netewên Yekbûyî Meryem Çelebî û Nûnerê Hevbendiya Niştimanî li Emerîka Quteube Idlibî, amade bûn.
Û Serokê Hevbendiya Niştimanî li ser pêşhatên pirosesa siyasî û encamên gera çaremîn ji karên Komîteya Destûrî ya Sûrî axivî, û tekezî li ser berdewamiya rijêma Esed di paşxistin û windakirina demê kir, daku hilbijartinên serokatiyê yên sala dahatî yên ku xwe ji wan re amade dike derbas bike, û bal kişand ser ku tevî nîşankirina civana gera pêncemîn ji Komîteya Destûrî lê em texmîn nakin ku ti pêşketin çêbibe.
Û Elherîrî cextî li ser pêwîstiya destpêkirina cîbicîkirina tam ji biryara 2254 kir, û sepeta destûrî bi tenê têrê neke û divê kar li ser vekirina tevaya sepetan bibe, û pêşinyar kir ku şandê navdewletî Gere Pederson aliyên sûrî vexwendî cinêvê bike, ji bo gengeşekirina desteya hikumdarî ya veguhêz, û di hevdîtinê de got ku dem hatiye ku herçar sepet werin gengeşekirin, û di vê derbarê de guvaşê bidin ser Rûsiya û rijêmê.
Û Elherîrî bal kişand ser ku biryara 2254 ji Komîteya Destûrî ya Sûrî mezintir e, û çênabe ku rûsiya xapandinê bike derbarê cîbicîkirina biryarê û kurtkirina wê di sepetekê bi tenê de ji nav her çar sepetan, û dît ku sepeta hukimdariyê gewhera cîbicîkirina biryarê hildigre, ji ber ku avakirina desteya hukimdarî ya veguhêz a xwedan tevaya desthilatên cîbicîkar tê de heye.
Û Serokê Hevbendiya Niştimanî tekezî li ser pêwîstiya destpêkirina bi serbestberdana girtiyan kir, û dît ku ew doseya di ser danûstandinê re ye, û tiştekî pir girîng e ji bo berdewamiya pirosesa siyasî, û ji Netewên Yekbûyî daxwaza bikaranîna fişaran li ser rijêmê û Rûsiya di vê derbarê de kir.
Û Elherîrî li ser şiroveya Pederson li pêşiya Encûmena Ewlekariyê axivî, û tekez kir ku gotina “Dadweriya Lihevhatinê” di rûniştinên pirosesa siyasî de derbas nebûye, û ew dijberî daxwiyaniya Cinêvê û biryarên navdewletî ye, û cextî li ser giringiya sizakirin û lêpirsênê ji bo serkeftina çareya siyasî li welêt kir.
Û Nûnerê Hevbendiya Niştimanî li Waşintin, Quteybe Idlibî, li ser kampa Elrikban û xirabiya rewşa mirovahî têde axivî, û bal kişand ser ku piştgiriya mirovahî yaku ji kampê re tête pêşkêşkirin ne bi awayekî rêkûpêk e, û got ku hemû çareserî demkî bûn, û tekezî li ser pêwîstiya dîtina çareyeke berwam bo kamp û derdeseriyên nişteciyên têde kir.
Ji aliyê xwe ve Rose Merry DiCarlo derbarê pêşveneçûna di karê Komîteya Destûrî de bêhêvîbûna xwe anî ziman, û tekezî li ser pabendiya Netewên Yekbûyî bi pirosesa siyasî li Sûriyê û cîbicîkirina tam a biryara 2254 kir, û bal kişand ser ku dê tevaya xalan li gel Emîndarê Giştî yê Netewên Yekbûyî Antonio Guterres û Şandê Navdewletî Gere Pederson gengeşe bike.
Jêder: Ofîsa Ragihandinê ya Hevbendiya Niştimanî ya Sûrî
