Hevrêzkar Ofîsa Karûbarên Penaberan ya Hevbendiya Niştimanî ya Sûrî Selîm Idrîs, daxwiyaniyên vê dawiyê yên Wezîrê Karûbarê Derve û Revendan ê Libnanê Ebdullah Bo Hebîb şermezar kirin, ji ber ku têde gotiye ku penaberên Sûrî ne bi darê zorê têne vegerandin, di dema ku Rêxistina Lêborînê ya Navdewletî herî kêm girtina çar Sûriyan piştî dersînorkirina wan ji Libnanê belge kiriye, her weha Navenda Wisûl ya Mafên Mirovan girtina ne kêmtir ji du kesan ji sûriyên ku ji libnanê dersînor bûne li ser destê Tabûra Çaremîn ya Artêşa rijêmê hatine binçavkirin, belge kiriye .
Û Idrîs di daxwiyaniyên taybet de îro got ku eger ji Wezîrê Libnanî re hêsan bû ku rastiya ku di raportên rêxistinên navdewletî, herêmî û navxweyî yên mafên mirovan de hatiye, derbarê tiştê ku penaberên Sûriyê yên li Libnanê rastiyê tên, di medyayê de red bike, gelo çawa dewleta Libnanî dikare hevrêziyê li gel rijêma Esed derbarê pirsa vegera penaberên Sûrî yên ku ji ber zordariya hêz û amûrên wê yên ewlekariyê reviyane bike?
Û Idrîs got ku ev çi hişmendî ye ya ku Wezîr û desthilatên Libnanî xwe dispêrinê, dema çarenivîsa qurbaniyan li gel tawankar gotûbêj dikin, û mafê kontrolkirina çarenûsa yekî ji ber desthilatdariyeke hov û tawankar reviyaye didin heman desthilatê?
Û ev yek piştî daxwiyaniyên Wezîrê Derve û Revendan ê Libnanê Ebdullah Bo Hebîb hat, yê ku di çarçoveya beşdarbûna xwe di civîna amadekarî ya Wezîrên Derve yên Ereban de gotibû:”Ti vegerandineke bi zorê ya derbiderên Sûrî ji Libnanê nîne” û her wiha got ku dewleta Libnanî li ser dosya vegerandina derbideran hevrêziyê li gel rijêma Sûrî û dewletên ereb dike.
Tevî ku berî bi demekê Rêxistina Lêborînê ya Navdewletî bal kişandibû ser ku dersînorkirina penaberan ji Libnanê “binpêkirineke eşkere ye” ji yasaya navdewletî re, li gorî prensîba “venegerandina kotekî”, ya ku nahêle dewlet bi zorê çi kesî vegerînin welatekî ku heye lê rastî çewsandinê were.
Û Hevbendiya Niştimanî ya Sûrî binpêkirinên berdewam ji aliyê hikûmeta Libnanê ve li dijî penaberên Sûrî şermezar kirin, ji ber ku bûyerên girtin û dersînorkirina kotekî berve deverên di bin kontrola rijêma Esed de dubare dibin, bêyî ti pabendiya bi mafên penaberan ên ku li ser asta navdewletî naskirî ne, û bi xemsarî li metirsiya ku ew penaber tûşî bibin dema vegerin Sûriyê dinêrin.
Jêder: Ofîsa Ragihandinê ya Hevbendiya Niştimanî ya Sûrî
