Hevrêzkarê Ofîsa Karûbarên Penaberan ya Hevbendiya Niştimanî ya Sûrî Selim Îdrîs, hişyarî ji karên ku hikûmeta Libnanê dermafê penaberên Sûrî yên li Libnanê pê radibe da, û bal kişand ser ku vegerandina penaberên ku ji hovîtiya rijêmeke xwînrêj reviyane ber bi deverên di bin kontirola wê de, tê wateya şandina wan bo zindan û girtîgehan.
Û Îdrîs di daxwiyaniyin taybet de, got ku hevalbendên rijêma Esed li Libnanê ji milîs û partiyan li pişt van operasiyonên neyasayî ne, û bal kişand ser ku hikûmeta Libnanî yasayên navdewletî yên ku vegerandina kotekî qedexe dikin, di rêya fişara hevalbendên rijêma Esed û amûrên wê yên li Libnanê re, binpê dike.
Û Îdrîs got ku Libnaniyê ku heyfa xwe ji penaberên Sûrî yên bêçare hiltîne bi bihaneya ku artêşa Sûriyê rojekê ew çewisandine, divê baş zanibe ku ew û wî penaberî herdû qurbaniyê rijêma tawankar in, û divê li dijî hevalbendên rijêmê di hikûmeta Libnanê de rabe, ne ku kîna xwe bi ser penaberan de birijîne.
Ji aliyê xwe ve Rêxistina Lêborînê ya Navdewletî bal kişand ser ku dersînorkirina penaberan ji Libnanê “binpêkirineke eşkere” ji yasaya navdewletî re li gorî prensîba “venegerandina kotekî”, ya ku nahêle dewlet bi zorê çi kesî vegerînin welatekî ku heye lê rastî çewsandinê were.
Û rêxistinê anî ziman ku wê herî kêm çar haletên girtina Sûriyan piştî dersînorkirina wan ji Libnanê belge kirine, herwiha Navenda Wisûl ya Mafên Mirovan jî girtina bi kêmanî 2 welatiyên Sûrî yên dersînorkirî ji aliyê Firqeya Çaran ve belge kiriye, û daxwaza rawestandina yekser ya helmetên dersînorkirinê ji hikûmeta Libnanê kir.
Û Komîteya Lêkolînê ya Neteweyên Yekbûyî, di raporteke xwe ya di heyva Adarê de, piştrast kir ku hîna Sûriyê ji bo vegerê cihekî ne ewle ye, ji ber berdewamiya operasyonên binçavkirinê û binpêkirinên mafên mirovan ji aliyê hêzên ewlekariyê ve.
Jêder: Ofîsa Ragihandinê ya Hevbendiya Niştimanî ya Sûrî
